DILI, STLTIMORLESTE.com – Prezidente Republika (PR), Jose Ramos Horta hatoo sentidu kondolensia ba Estadus Unidus hafoin inundasaun neebe devastadora iha Texas.
Prezidente Republika Jose Ramos Horta espresa nia tristeza profunda hafoin inundasaun devastadora neebe akontese iha Texas Sentral iha loron 4 Julhu 2025, hodi rezulta iha lakon vida signifikativu no família sira barak tenke husik sira nia uma.
Inundasaun trajiku nee halakon ona pelumenus ema nain 82 nia vida, ho ema liu nain 40 neebe mak seidauk hetan no família rihun resin mak afetadu husi dezastre nee.
Ekipa sira resposta emerjensia nian, voluntariu sira no trabalhador sira salvamentu nian kontinua sira nia esforsu sira neebe la hatene kole hodi lokaliza sobrevivente sira no fornese asistensia ba komunidade sira neebe afetadu.
Iha karta ofisial ba Prezidente Estadus Unidus Amerika, Donald Trump, iha loron Segunda (7/07/2025), Prezidente Ramos Horta espresa povu Timor Leste nia solidariedade ho povu Amerikanu sira iha tempu difísil ida nee.
Prezidente rekonhese esforsu estraordinariu husi ekipa salvamentu no voluntariu sira neebe kontinua servisu ho korajen no dedikasaun atu salva moris no ajuda sira neebe presiza.
“Iha momentu ida moras no sofrimentu nee, hau hakarak hatoo ba Vossa Excelência, família enlutada, no ba povu Estadus Unidus Amerika, , hau nia solidariedade no kondolensia sinseru,” Prezidente Ramos-Horta afirma.
PR Horta dehan, Timor Leste akompanha ho laran susar no esperansa, esforsu estraordinariu husi ekipa salvamentu sira, voluntariu sira no sira hotu neebe ho aten barani no dedikasaun, kontinua servisu makaas hodi salva sobrevivente sira no tulun komunidade sira neebe afetadu.
“Ami reza ba vítima sira husi katastrofe ida nee no ba família sira hotu neebe aguenta tempu susar hanesan nee, hein katak sira bele hetan konfortu iha unidade husi ita boot nia povu no iha espíritu kompaisaun no reziliensia neebe sempre karakteriza Estadus Unidus Amérika.” katak Horta.
Prezidente Ramos Horta sublina katak, Timor Leste hamriik iha solidariedade ho Estadus Unidus durante tempu trajedia ida nee reflete lasu amizade neebe metin no respeitu ba malu entre nasaun rua nee.
(eme)
