DILI, STLTIMORLESTE.com – Prezidente Republika Jose Ramos Horta hatoo solidaridade ba Vietnam, hafoin Devastadores Tufaun Bualoi no Mato.
Liu husi komunikadu neebe STL asesu Kuarta (15/10/2025) hatete, Prezidente Republika Ramos-Horta, hatoo solidariedade ba povu no governu Vietname hafoin Devastadores Tufaun Bualoi no Matmo.
Tufaun sira-nee forte hamosu inundasaun grave no halo estragu extensivu iha Vietnam Norte, inklui Provínsia Thai Nguyen, neebe iha komunidade estudante Timoroan signifikativa ida. Tufaun sira nee rezulta iha perda umana signifikativa, destruisaun uma no infraestrutura, no impaktu makass ba area agríkola sira, kria situasaun humanitaria neebe urgente.
Iha karta formal ida neebe diriji Lương Cường, Prezidente Republika Sosialista Vietnam nian, Prezidente Ramos-Horta, hatoo ninia nasaun nia solidariedade klean liu ba família sira neebe afetadu hosi tufaun devastador Bualoi no Matmo.
Prezidente Ramos-Horta afirma, “iha momentu tristeza no susar ida nee, hau reafirma amizade no estima povu Timoroan nian ba povu Vietnamita, hodi garante katak TL akompanha akontesimentu sira nee ho preokupasaun klean no dezeja ba rekuperasaun lalais no restaurasaun normalidade ba sira hotu neebe afetadu hosi dezastre naturál sira-nee,” katak Horta.
Prezidente Ramos-Horta konklui hodi hatoo TL nia apoiu ba povu Vietnam nian bainhira sira halao esforsu hodi salva, ajuda, no rekonstrusaun nee krítiku iha rejiaun sira neebe afetadu.
Jornalista: Emerenciana Pinto
Editora: Domingas Gomes
