DILI, STLTIMORLESTE.com – Prezidente Republika (PR), Jose Ramos Horta hatoo solidariedade ba Xina hafoin inundasaun no rai halai neebe devastador.
Prezidente Republika José Ramos Horta hatoo ninia sentidu kondolensia ba Republika Popular Xina hafoin inundasaun no rai halai neebe makaas iha Provínsia Gansu no rejiaun sira seluk, neebe mak rezulta trajiku iha lakon vida, kanek no estragus material neebe boot.
Iha karta ofisial ho data 14 Agostu 2025 neebe diriji ba Prezidente Republika Popular Xina, Sua Exelensia Sr. Xi Jinping, Prezidente Ramos Horta hatoo sentidu kondelensia profundu.
“Hau hakarak hatoo ba Vossa Exelensia, Governu, no povu Xina, hau nia sentidu kondolensia profunda, nunee mós Timor Leste nia solidariedade durante tempu tristeza no adversidade ida nee. Ami nia hanoin no orasaun hamutuk ho família enlutada sira, sira neebe lakon no kanek sira, no ami deseja ba sira forsa no rekuperasaun lalais. Ami mos louva esforsu inkansavel nian, ekipa salva vida sira no medida sira neebe autoridade xineza sira foti hodi tulun komunidade sira neebe afetadu,” Katak PR.
PR Horta dehan, Timor Leste hamriik metin hamutuk ho povu Xina iha espíritu amizade no solidariedade nian, ho konfiansa katak reziliensia no determinasaun nasaun Xina nian sei orienta rejiaun sira neebe afetadu ba rekuperasaun no rekonstrusaun.
(eme)
