DILI, STLTIMORLESTE.com – Durante Prezidente Republika (PR), Jose Ramos Horta vizita privadu no trabalhu ba Melbourne, Australia, iha loron Tersa, 12 Agostu 2025, hetan entrevista ho media ka komunikasaun sosial sira perfil aas Australia nian.
Entre meiu komunikasaun sosial sira neebe marka prezensa iha Jornal Morning Peninsula, Channel 7 no ABC Pacific Program, neebe permite alkansa audiensia makaas.
Iha entrevista, Xefe Estadu aprezenta vizaun estratejika no prioridade Timor-Leste nian, diskusaun klean sira kobre espektru tomak ba ajenda nasional no polítika esterna nian.
Aborda mos asuntu ekonomiku sentral sira, hanesan futuru ba projetu Greater Sunrise no nesesidade estratejika atu diversifika ekonomia. Sublina mos importansia husi Timor Leste nia adezaun ba ASEAN no reflete kona-ba importansia justisa no prezervasaun memoria istorika, hodi fo omenajen ba jornalista sira neebe mate iha Balibo iha tinan 1975.
Prezidente Republika reafirma ninia kompromisu ba dezenvolvimentu sustentavel, integrasaun rejional, no hametin ligasaun kultural no polítika neebe klean entre Timor-Leste no Australia.
Entretantu Prezidente Republika destaka mos urjensia atu hasoru mudansa klimatika, investe iha jerasaun foun ba lider sira iha futuru, no hasae parseria sira iha Pasífiku tomak, hodi reafirma Timor-Leste nia papel nuudar membru proativu no konstrutivu iha komunidade internasional.
(eme)
