DILI, STLTIMORLESTE.com – Prezidente Republika (PR), Jose Ramos Horta hasoru malu ho Alta Komisariu Nasoins Unidas ba Direitus Umanus, Volker Türk, hodi hametin kooperasaun Internasional no hametin partisipasaun ativa Timor Leste nia inisiativa Direitus umanus Global.
Prezidente Republika hasoru malu ho kAlta Komissariu Nasoins Unidas ba Direitus Umanus, Volker Türk, iha Palais des Nations, Genebra.
Tuir komunikadu neebe STL asesu husi media Prezidente Republika Kuarta (25/02/2025) hatete, enkontru neebe halao iha marjen Sesaun ba dala 61 Konselhu Direitus Umanus ONU nian nee, foka ba progresu demokratiku Timor-Leste nian neebe forte no ninia jestaun ba krize sanitaria no klimatika sira.
Iha hasoru malu nee lider nain rua Alta Komissariu no Prezidente foti mos kestaun kona-ba papel estratejiku nasaun nian hodi promove pas no estabilidade iha rejiaun Sudeste Aziatiku.
“Diskusaun sira nee reafirma importansia kooperasaun internasional no multilateralizmu, hodi hametin partisipasaun ativa Timor Leste nian iha inisiativa direitus umanus global no operasaun pas nian sira,” haktuir husi Komunikadu.
Líder nain rua nee enfatiza nesesidade urjente atu mobiliza rekursu husi governu, sosiedade sivíl, no parseiru global sira hodi apoia projetu sira neebe dedika ba protesaun direitus umanus no haforsa reziliensia ekonomika.
Enkontru diplomatiku ida-nee reafirma fali pozisaun internasional Timor-Leste nian nuudar modelu demokrasia no estabilidade nian. Liuhusi dialogu nee, Prezidente kontinua hatudu Timor-Leste nia kompromisu neebe makaas hodi defende dignidade umana no haburas aliansa global sira neebe garante orden internasional neebe pasífiku no justa.
(eme)
