DILI, STLTIMORLESTE.com – Prezidente Republika (PR), Jose Ramos Horta halo enkontru ho deputadu nain 4 husi Asembleia Republika Portugal, hodi koalia kona-ba relasaun Timor Leste (TL) ho Portugal.
Prezidente Komisaun Parlamentar Negosiu Estranjeiru Komunidade Portugues, Jose Cesario ba jornalista sira bainhira remata halo enkontru ho Prezidente Republika Jose Ramos Horta, iha Palasiu Prezidensial Nicolau Lobato, Bairo Pite, Kuarta lokraik (10/12/2025) hatete, ohin hasoru Prezidente diskute kona-ba relasaun TL ho Portugal.
“Ami iha nee reprezenta Asembleia Republika Portugal, no ami haree ida nee hanesan oportunidade ida atu hatoo ba Prezidente ami nia disponibilidade ba kolaborasaun tomak, kona-ba saida mak iha relasaun ho Timor nia objetivu, dezenvolvimentu no relasaun ho Portugal, ita iha aspetu espesífiku neebe merese atensaun espesial tebes. Prezensa husi kultura no defeza portuges nian mak sai hanesan kestaun sentral sira. Klaru katak, kooperasaun polítika mos importante iha domíniu bilateral no multilateral,” dehan Prezidente Komisaun Parlamentar.
Nia hatete, prezensa ohin loron aprosimasaun iha ASEAN, kolaborasaun mos bele eziste ho Portugal, maibe liu-liu saida mak Parlamentu Portugal, Asembleia Republika, agora ho konstituisaun idanee, liu husi ninia partidu boot tolu, disponivel ba kolaborasaun makaas liu tan iha area polítika hotu-hotu iha nível internasional, la haluha portuges sira neebe iha Timor no sira neebe iha Portugal.
Karik durante hasoru malu Prezidente Republika ho deputadu sira husi Portugal diskute mos kona-ba kooperasaun bilateral entre Timor Leste ho Portugal? Hatan ba kestaun nee Prezidente dehan, sim hasoru malu koalia mos kona-ba relasaun bilateral no kooperasaun mak sentral tebes.
“Sim, kooperasaun mak sentral tebes. Kooperasaun sei halo, no halo daudaun ohin loron, ho maneira ida neebe makaas tebes. Ida nee iha aspetu oin-oin, seguransa, defeza, edukasaun, kultura no seluk tan,” dehan nia.
Iha hasoru malu nee Prezidente Republika Jose Ramos Horta hatoo benvindu ba Prezidente Komisaun Parlamentar Negosiu Estranjeiru Komunidade Portuges, Jose Cesario ho deputadu sira neebe mak ohin mai hasoru malu ho Xefe Estadu hodi koalia kona-ba relasaun entre Timor Leste ho Portugal.
Jornalista: Emerenciana Pinto
Editor: Xisto Mendonça
