DILI, STLTIMORLESTE.com – Prezidente Republika (PR), Jose Ramos Horta ho Embaixador Argelia diskute kona-ba kompromisu hanesan ba deskolonizasaun.
Iha loron kinta lokraik (22/05/2025) Prezidente Republika, Jose Ramos Horta simu Sabri Boukadoum, Embaixador Argelia, ba vizita amizade ida. Sira koalia kona-ba ligasaun metin entre Timor Leste no Argelia, hodi nota katak nasaun rua fahe valor no istoria luta neebe hanesan ba independensia.
Embaixador hatudu katak nasaun rua nee fiar metin atu ajuda fatin sira sai livre husi ukun kolonial (dekolonizasaun).
Embaixador mos temi katak diak atu haree Timor Leste lidera iha area ida nee, liu-liu tanba enkontru importante ONU nian kona-ba deskolonizasaun (C24) akontese daudaun iha Dili.
Embaixador Boukadoum agradese ba Prezidente, Governu no povu Timor Leste neebe barani no laran luak. Nia dezeja nasaun kontinua susesu no sorte diak, no enkontru nee hatudu relasaun diak no entendimentu entre nasaun rua nee.
Prezidente Republika Jose Ramos Horta hatete, Timor Leste nia Legadu Istoriku no Lejitimidade Moral husi nia lian iha C24.
“Timor Leste iha nia aan rasik, nuudar testamentu moris ba luta naruk no reziliente husi povu ida ba nia direitu ba autodeterminasaun. Deskonhesidu nuudar territoriu laos autonomu husi Nasoens Unidas iha dékada 1960, nafatin iha administrasaun kolonial portugeza nia okos, TimorbLeste hetan rekonhesimentu internasionál iha tinan 2002, ho restaurasaun independensia iha loron 20 fulan Maiu. Konkista liberdade polítika liu husi prosesu ida neebe sustenta husi solidariedade internasional, lejitimidade husi direitu internasionál no servisu inkansável husi Nasoins Unidas — inklui papél fundamentál hosi Komité Espesial ba Deskolonizasaun,” dehan PR Horta.
PR Horta dehan, ida nee mak momentu ida neebe nobre liu iha sistema Nasoins Unidas nian no iha kooperasaun no solidariedade internasional.
(eme)
