DILI, STLTIMORLESTE.com – Prezidente Republika (PR), Jose Ramos Horta ho Eis Embaixador Grover J. Rees hasoru malu hodi diskute kona-ba konstrutivu dezenvolvimentu Timor Leste iha futuru.
Iha biban nee Prezidente Republika, Jose Ramos Horta fo benvindu ba eis Embaixador Estadus Unidus nian iha Timor Leste, Grover J. Rees, enkontru nee halao iha Palasiu Prezidensial, Nikolao Lobato, Bairo Pite, Segunda (26/05/2025).
Embaixador Rees durante nee halao servisu ho distinsaun iha Timor Leste husi 2002 too 2006, fahe relasaun kleur no kolejial ho Prezidente Ramos Horta.
Dialogu konstrutivu entre Prezidente Ramos Horta no Embaixador Rees foka iha Timor Leste nia trajetpria dezenvolvimentu neebe lao daudaun, perspetiva futuru no asuntu nasional importante sira.
Embaixador Rees fahe nia observasaun kona-ba progresu nasaun nian dezde nia mandatu, no líder sira diskute mos estratejia sira ba kreximentu sustentavel.
Embaixador sublina kona-ba importansia husi setor privadu ida neebe vibrante no orienta ba benefísiu pibliku no reforsu kontínua husi instituisaun publika esensial sira, inklui edukasaun no kuidadu saide, hodi kapasita sidadaun Timoroan hotu-hotu.
“Hau haree no vizita dala barak talvez tinan ida dala ida hau sempre haree kareta barak liu duke antes no edefisiu barak no boot barak duke antes nee bele sai diak oituan,” katak Eis Embaixador.
Envolvimentu nee reflete Prezidente Ramos Horta nia kompromisu neebe metin atu haburas lasu diplomatiku neebe metin hodi avansa interese nasional Timor Leste nian.
Embaixador Rees aproveita mos oportunidade hodi elojia jornalista timoroan sira ba sira-nia dedikasaun kontinua no halao serbisu importante, hodi sublina valor husi paizajen mídia ida neebe metin iha dezenvolvimentu demokratiku nasaun.
(eme)
