DILI, STLTIMORLESTE.com – Prezidente Republika (PR), Jose Ramos Horta ho Reprezentante Kompanha Santos Jose Lobato diskute kona-ba investimentu Santos no produsaun Bayu Undang.
Bainhira remata hasoru malu, reprezentante Kompanhia Santos Jose Lobato ba jornalista sira iha Palasiu Prezidensial Nikolao Lobato, Bairo Pite Tersa nee (13/05/2025) hatete, ohin hasoru malu ho Prezidente Republika diskute kona-ba produsaun Bayu Undang.
“Ohin ami reprezenta Santos hasoru Prezidente Republika, Jose Ramos Horta koalia kona-ba pontu rua investimentu Santos ninia, no mos produsaun Bayu Undang. Bainhira Santos simu knaar nuudar operador Bayu Undang iha 2020, entaun momentu neeba Santos deside atu investe tan mina matan tolu,” katak Jose Lobato.
Reprezentante Kompanhia Santos Lobato dehan, tanba baku mina matan tolu nee mak bele dada naruk produsaun Bayu Undang, lo-loos nee se laiha mina matan tolu nee produsaun Bayu Undang hotu iha 2022, entaun ho ida nee mak bele dada too agora 2025.
“Maibe ami informa ba Prezidente Republika, la kleur tan Santos haree katak produsaun Bayu Undang sei remata. Entaun ami mai informa ba Prezidente Republika kona-ba produsaun Bayu Undang neebe la kleur sei remata,” katak nia.
Nia dehan, normalmente bainhira produsaun gas ka petroleum hotu, entaun nee hakat ho prosesu ida naran atu desmantela plataforma ninian.
“Agora husi Santos sei iha hanoin atu investe tan iha Timor Leste ho projetu gas karbon ninian ita hatama fali ba iha rezerva Bayu Undang neebe mamuk tiha ona nee. Ohin loron problema mudansa klimatika sai problema boot ida, entaun iha mundu hanoin halo nusa bele hamenus emisaun gas karbon ninian ba atmosfera. Ideia ida mak bainhira iha prosesu des-produsaun petroleum ninian, sei iha gas karbon, se lae baibhira iha atividade industria hanesan iha Korea ka Japaun entaun sira prepara gas karbon nee depois lori ba neeba hanesan saida mak iha Bayu Undang,” katak nia.
Ho ida nee investimentu ida neebe husi Santos hanoin atu halo iha futuru. Iha momentu nee sei iha diskusaun ho governu, se konsege iha akordu tinan ida nee, entaun karik projetu ida nee sei bele lao ba oin.
Entretantu, iha enkontru nee Prezidente Republika, Jose Ramos Horta nota informasaun neebe Santos hatoo no mos ho sujestaun balun iha diskusaun ho governu ninian.
(eme)
