DILI, STLTIMORLESTE.com – Prezidente Republika (PR) José Ramos Horta hasoru malu ho Profesor Rufus Black, VisI Reitor no Prezidente Universidade Tasmania diskuti hamutuk foka liu ba hametin kooperasaun entre Timor Leste ho instituisaun Australia.
Prezidente Republika Jose Ramos Horta hatoo lia hirak nee ba jornalista sira hafoin remata vizita privadu ba Australia, fila hikas mai iha Timor Leste iha Aeroportu Prezidente Nicolau Lobato Dili, Sabadu (12/10/2024).
Prezidente Republika halo rezumu viajen ba Australia nee fahe ba parte rua, parte ida iha Sidney, maske iha enkontru balun hakarak haree saida mak sira bele apoiu ba Timor Leste. Koalia kona-ba Timor Leste nia situasaun.
“Ita nia istoria oituan, 2024 Timor Leste neebe dame, iha progressu, depois Cambera importante liu national press clube nee ba Australia tomak, diplomata, membru governu lubuk ida iha neeba,” katal PR Horta.
Maske vizita privadu, Governadora Jeral hakarak simu entaun enkontru ho Governadora Jerál. Nunee liu ba Tazmania enkontru akademiku sira haree projetu balun sira hakarak halo iha Timor, sira halo tiha ona levantamentu atu halo iha Atauro,” katak PR Horta.
“Hau rona, koalia hau gosta tebes-tebes projetu nee, hau hatete ba sira projetu nee tenke iha Visi Primeiru Ministru Dezenvolvimentu Rural nia okos, bele sai ekonomia boot ba Timor Leste nian, depois mak hau sei esplika didiak ba Visi Primeiru Ministru,” dehan PR Horta.
Durante viajen ba Australia halo palestra dala ida tan iha Tazmania, depois liu ba Melborm mak atividade ida deit iha universidade Vitoria, universidade ida neebe Timoroan barak ba estuda iha neeba, foti mestradu, doutoramentu iha neeba.
Nunee mos Profesór Black neebe tau matan ba dezenvolvimentu estratejiku universidade, kualidade ensinu, peskiza no operasaun jeral sira, envolve iha diskusaun ho Prezidente Republika kona-ba area xave sira ba kolaborasaun nian. Diskusaun nee sublina programa bolsa estudu nian no inisiativa sira ba kapasitasaun institusional nian iha setor servisu publiku, saude no edukasaun.
Enkontru nee reforsa kompromisu mutuo atu hasae kolaborasaun entre Timor Leste no Universidade Tasmania, foka ba projetu sira neebe haburas dezenvolvimentu sustentavel no hadia servisu esensial sira iha nasaun Sudeste Aziatiku nee.
Entretantu, Prezidente Republika Jose Ramos Horta partisipa iha lansamentu projetu pilotu “Ataúro Lobster Project”. Inisiativa nee nuudar kolaborasaun entre Institutu Estudu Tasi no Antartiku (IMAS) iha Universidade Tasmania no Prezidensia Republika Timor Leste.
Lansamentu nee halao durante vizita serbisu privadu Prezidente Republika nian iha Universidade Tasmánia. Xefe Estadu kompromete hodi fasilita kontaktu nesesariu sira ho Governu hodi identifika rai neebe adekuadu ba dezenvolvimentu projetu nian no fornese edifísiu ida iha Díli hodi tau nia jestaun.
(eme)
