DILI, STLTIMORLESTE.com – Prezidente Republika (PR), Jose Ramos Horta husu estudante sira kontinua estuda makaas no aprende lingua, tanba nasaun iha joven sira nia liman.
Prezidente Republika Jose Ramos Horta hatoo kestaun nee liu husi nia diskursu iha serimonia seminariu Nasional ho tema “Konseitu Estadu no Vizaun Estratejika ba Dezenvolvimentu Nasional” iha salaun Institute of Business (IOB), Sesta (08/08/2025).
Prezidente Republika hatete, estudante sira mak futuru nasaun nia, tanba nee kontinua atu estuda makaas no aprende lingua barak liu-liu lingua português no inglês inklui lian sira seluk.
“Hau husu ba estudante sira atu estuda makaas no aprende barak, liu-liu aprende materia Matematika no mos aprende Lingua Português no Ingles inklui lian sira seluk atu bele hetan valor diak hodi hetan bolsu estudu ba rai liur,” dehan PR Horta.
Prezidente Republika hatete, uluk Timoroan sai profesor doutor sura ho liman fuan, maibe ohin loron Timoroan barak mak sai profesor no doutor, maibe husu estudante sira kontinua estuda no aprende lingua sira, tanba hetan elizivel bainhira iha territoriu entre Fronteira ho nasaun sira seluk. Tanba nee nia husu Estudante sira atu estuda makaas no aprende barak, tanba Timor Leste agora halo bilateral entre nasaun barak liu-liu nasaun dezenvolvidu sira atu bele fo oportunidade ba estudante oan sira bele ba aprende iha ema nia rai.
Xefe Estadu haktuir tan katak, uluk inan aman sira hamriik luta atu Timor Leste hetan nia independensia, ohin loron Timor Leste hamriik hanesan joven ida. Tanba nee husu ba inan-aman no dosente sira atu hakaas estudante sira atu estuda makaas no aprende barak, loron ruma sira bele implementa saida mak sira aprende ona.
“Tanba uluk ita nia lideransa sira nee aprende oituan no sempre hasoru dezafiu barak, tanba ita funu ho ita nia inimigu sira.” dehan Prezidente Republika.
Prezidente rekonhese katak Timoroan barak mak agora sai matenek lemo-lemo iha nasaun boot sira, tanba uluk Timoroan seidauk bele, tanba situasaun mak la permite atu estuda tanba iha situasaun difisil. Ohin loron livre ona tenke aprende barak, tanba Timor Leste iha ona mudansa barak iha teknolojia neebe iha atu aproveita hodi estuda no adapta teknolojia barak.
(eme)
