DILI, STLTIMORLESTE.com – Prezidente Republika (PR), Jose Ramos Horta husu Governu atu halo alargamentu ba modernizasaun sidade.
Lia hirak nee hatoo husi Ministru Justisa, Sergio Hornai ba jornalista sira bainhira remata halo enkontru ho Prezidente Republika Jose Ramos Horta iha Palasiu Prezidensia Republika Nikolao Lobato, Bairo Pite Segunda (12/05/2025).
Ministru Justisa hatete, ohin Prezidente Republika Jose Ramos Horta bolu Ministru Justisa ho ekipa atu update oinsa mak halo alargamentu.
“Prezidente mos hanesan Xefe Estadu husu ba Governu liu-liu Ministeriu responsavel ba iha justisa nia iha parte politika alargamentu oinsa mak ita halo modernizasaun ba ita nia sidade, ida nee pasparte husi atividade neebe ohin hau hasoru ita nia sua exelensia Prezidente Republika,” katak nia.
Alagramentu nee konaba atividade neebe husi Prezidensia planea tiha ona para atu haluan tan ezistensia koridor Prezidente Republika nia liu-liu ba iha parte kotuk no sorin sorin, nunee konforme politika neebe define ona husi planu Prezidensia nia bele halo konektividade ba ida nee.
Ministru dehan, Prezidente Republika Jose Ramos Horta bolu Ministeriu Justisa ho ekipa atu update informasaun Ministeriu nia kona-ba alargamentu neebe mai husi Prezidente Republika.
“Senhor Prezidente bolu hau hanesan Ministru Justisa mai ho ekipa para haree took update fo informasaun iha relasionamentu ba iha servisu Ministeriu Justisa nia, liu-liu alargamentu sira neebe mai husi Prezidente rasik, Prezidensia rasik atu halo alargamentu atu bele ba iha terenu sira neebe partense ba Prezidensia Republika nia atu bele apoiu formasaun sira ba iha Prezidente Republika,” katak Ministru.
Aleinde nee hatoo informasaun balun neebe relasiona ho politika governu nia iha relasionamentu ba iha atribuisaun rai sira ba iha sidadaun sira tantu ba iha títulu nunee mos ba iha arendamentu nomos ba iha rai sira neebe partense ba estadu neebe afeitadu ba iha dezenvolvimentu roman husi Governu nia.
Prezidente Republika Jose Ramos Horta mos fo hanoin buat balun ba iha Governu liu-liu ba iha Ministeriu Justisa ninia portafolio ninia papel atu oinsa mak atu haree koordenasaun dia-diak ho ministeriu relevante tantu Obras Publika no MAE liu-liu iha politika urbanizasaun nia tantu iha Dili nomos fatin seluk.
“Tanba ita boot sira hatene muito bem loron ba loron pedidu mai husi sidadaun nasional ninia servisu emprezarial sira nomos sempre husu pedidu mai iha ministeriu para atu halo arendamentu sira nomos husu konsesaun ka lisensa atu bele uza propriedade Estadu nia, ho ida nee mak ohin senhor Prezidente bolu hau ho ekipa mai hatoo hela informasaun balun,” katak nia.
MJ dehan, Prezidente fo hela hanoin balun ba iha Ministeriu Justisa ida oinsa mak atu haree buat balun neebe Prezidente Republika halo tiha ona ho parseiru sira atu halo atividade dezenvolvimentu balun iha Timor, maibe Timor presiza bisiversa troka buat balun rai estadu nia para sira bele halo buat balun neebe fo ba Governu, Abudabi hakarak fo ba iha Timor halo atividade sira karik kaza dormitoriu ba iha estudante sira ba oin ida nee mos sai prioridade ba Prezidente Republika nia.
Halo koordenasaun makaas ho Ministeriu relevante liu-liu teras no propriedade nunee mos ba iha Ministeriu Obras Publika atu haree sasan sira nee ba oin sei forma exclusiva bele hatan ho urjensia ba iha pedidu sira neebe mai husi nasaun amigos sira.
(eme)
