SALELE, STLTIMORLESTE.com – Prezidente Republika (PR), Jose Ramos Horta husu Governu tau matan ba polisia sira neebe halao knaar iha linha Fronteira.
Prezidente Republika, Jose Ramos Horta hatoo kestaun nee liu husi nia diskursu, bainhira remata fahe nesesidade baziku ba komunidade uma kain 40 iha Suku Biseuk, Postu Administrivu Tilomar, Munisipiu Kovalima, Kinta (27/03/2025).
Prezidente Republika hatete, nia sempre vizita komunidade sira iha Fronteira, no sempre koalia mos Primeiru Ministru nomos Ministru interior oinsa tau matan mos ba polisia iha Fronteira.
“Hau espera Ministru Gastão neebe responsavel ba Planeamentu Estratejiku haree importansia Fronteira, hau hatete ba nia hau koalia tiha ona fulan hira liu ba, tinan hira liu ba kuandu tama planeamentu estratejiku ita haree Fronteira hanesan Autoridade,” katak PR, Horta.
Aprende mos ho nasaun seluk buka aprende buat ruma se hanoin hatene ona buat hotu nee mak lakohi aprende husi nasaun seluk, maibe Prezidente Republika lae, nia kontinua buka aprende ho ema seluk husi nasaun oin-oin.
“Hau lae, hau sempre buka aprende, aprende iha rai laran no aprende iha rai seluk, nunee ita bele halo buat ruma diak iha rai laran,” katak Prezidente.
Iha biban nee, Prezidente Republika husu Governu nafatin tau matan ba polisia iha Fronteira, tanba sira mak halo vijilansia, tanba nee tenke tau kondisaun ba polisia neebe hela iha Fronteira, tanba vida difisil iha Fronteira.
“Hau hatete tiha ona ba Primeiru Ministru dala hira, seguransa ba membru Governu sira barak demais atus rua lima nulu mak halo seguransa ba ministru sira, no iha Fronteira tomak polisia sira 80 deit mak toma konta, entaun hau hatete favor haree sira didiak para garante seguransa uma iha familia sira iha aldeia,” katak PR, Horta.
Prezidente Republika hatete, maske Prezidente Republika husu tau matan ba Polisia Fronteira hodi garante seguransa ba komunidade sira, maibe koalia deit, maibe desizaun hotu mai husi Governu, no karik Governu iha planu atu apoiu entaun Parlamentu Nasional mak fo autorizasaun, ida nee mak sistema.
(eme)
