DILI, STLTIMORLESTE.com – Prezidente Republika (PR), Jose Ramos Horta husu hotu-hotu hametin solidariedade no harmonia hodi enfrenta tinan foun.
Iha loron 1 fulan Janeiru, Prezidente Republika, Jose Ramos Horta festeja tinan foun 2025 diak ba hotu-hotu, iha oras 23:00 antes tama ba loron 1 fulan Janeiru 2025, Prezidente Republika, José Ramos Horta halao diskursu iha Palasiu Prezidensial hodi selebra tinan foun hamutuk ho povu. Iha diskursu nee, nia fo mensajen esperansa no unifikasaun, fo enfaze ba Unidade Nasional.
Xefe Estadu husu ba ema hotu-hotu atu hametin solidariedade no harmonia, hodi enfrenta dezafiu sira iha tinan foun nee. Iha tinan foun 2025 Australia no Timor Leste sei fo sai inisiativa foun importante sira hodi apoia Timor Leste nia dezenvolvimentu ekonomiku.
“Foin lalais ita rona Primeiru Ministru Australia, Anthony Albanese no Primeiru Ministru Timor Leste, Kay Rala Xanana Gusmão halo Komunikadu Konjuntu ida sei iha informasaun diak liu tan ba ita nia ekonomia,” hatete PR, Ramos Horta.
Kona-ba Dezenvolvimentu Sustentavel, Prezidente Republika mos sublina importansia ba partisipasaun juventude no kontribuisaun ba dezenvolvimentu nasaun, hodi garante futuru ida neebe naroman.
“Iha tinan 2025, espera ita bele tama ona ba ASEAN, maibe nee desizaun Líder boot sira iha ASEAN. Atu atinji ba mehi ida nee, Xefe Estadu husu ba ema hotu-Hotu, liu-liu ba joven sira grupu arte marsial sira halo komitmentu atu labele iha violensia no ita tenke haklean dame, haklean domin iha rai ida nee,” dehan Xefe Estadu.
Ikus liu, Prezidente Republika hakarak mos atu promove justisa no pas, labele iha violensia iha uma laran, liu-liu labele baku labarik sira, mane sira iha uma labele baku feto sira, tenke kria harmonia justisa no pas, tanba husi nee mak baze importante ba estabilidade nasional.
Prezidente Republika husu ba povu atu kontinua hametin valor sira nee, no servisu hamutuk ba futuru diak liu ba Timor Leste.
(eme)
