DILI, STLTIMORLESTE.com – Prezidente Republika (PR), Jose Ramos Horta husu joven Timoroan estuda makaas, tanba joven sira mak futuru nasaun nia.
Prezidente Republika Jose Ramos Horta hatoo kestaun nee liu husi diskursu hodi fo mensajen ba estudante sira iha Palasiu Prezidensial Bairo Pite, Sesta (06/12/2024).
Nia hatete, joven mak futuru nasaun nian, tanba nee husu kontinua estuda hodi hasae kapasidade.
“Hau sempre hatete ba joven sira, primeiru mensajen iha TL iha mundu, hau koalia dala barak rihun ba rihun iha mundu ba partisipante sira estudante sira iha universidade oin-oin, hau hatete estuda, estuda, estuda no estuda não paracer melhor, não paracer bom apenas mais parecer o melhor, ita tenke mehi hakarak sai diak liu,“ dehan Prezidente Republika.
Horta hatete, nia la hatene klasifikasaun iha Timor oinsa, labele deit sufisiente no seluk tan, maibe tenke masimu.
Xefe Estadu hatete, bainhira joven sira hakaas aan estuda sai matenek, inan aman neebe mak kolen husi kiik too boot mos sei orgulhu, Xefe Suku ka Xefe Aldeia no sosiedade mos orgulhu no nasaun mos orgulhu, bainhira matenek ho kapasidade sei lori nasaun no povu nee ba oin ho diak.
Iha biban nee Xefe Estadu kontinua enkoraja joven sira nafatin estuda no estuda, tanba joven mak futuru nasaun nia, no joven mak sei troka lider sira hodi lori rai nee ba oin, tanba nee presiza estuda sai matenek, nunee aban bainrua lori povu no rai nee ba oin.
(eme)
