DILI, STLTIMORLESTE.com – Prezidente Republika (PR), Jose Ramos Horta husu Polisia Ofisial promovidu hotu-hotu kontinua hametin servisu no dezenvolve abilidade, mentalidade no pratika administrasaun sira hodi garante dezenpenhu iha estadu no populasaun ho integridade no dedikasaun neebe efikasia.
Mensajen Prezidente Republika Jose Ramos Horta hatoo iha okaziaun Aniversariu Polísia Nasional Timor-Leste (PNTL) ba dala-26, Sesta (27/03/2026).
Nia hatete, ohin selebra aniversariu kriasaun Polísia Nasional Timor-Leste (PNTL) ba dala 26. Prezidente presta omenajen ba ofisial polísia sira hotu neebe, durante tinan 26 nee, kontribui ona ba konstrusaun, dezenvolvimentu, no modernizasaun ba instituisaun.
“Ita fo onra ba ajente polísia sira neebe oras nee halao knaar, neebe dedika loroloron ba seguransa no protesaun sidadaun sira-nian ofisial polísia reformadu sira, neebe sira-nia serbisu no dedikasaun ajuda konsolida PNTL nuudar instituisaun referensia no ofisial polísia sira neebe mate, neebe fo sira nia moris iha servisu, husik hela legadu aten-barani no profisionalizmu ezemplar. PNTL ohin loron nuudar forsa polísia ida neebe modernu, responsavel no respeitadu, tantu husi autoridade nasional no internasional sira, neebe konstitui pilar fundamental ba seguransa, estabilidade no dezenvolvimentu iha Timor Leste,” dehan PR Horta.
Prezidente Republika hatete Iha momentu selebrasaun ida-nee, loos no merese deit atu fo parabens ba membru polísia sira hotu neebe foin hetan promosaun.
“Esensial katak ofisial promovidu hotu-hotu kontinua hametin servisu, dezenvolve abilidade, mentalidade, no pratika administrativa sira neebe garante exelensia iha dezempenu sira-nia knaar, serbí Estadu no populasaun ho integridade, dedikasaun no efikasia. Promosaun sira reprezenta rekonesimentu ba meritu, dedikasaun, no profisionalizmu neebe hatudu durante servisu tomak, enkuantu admisaun ba rekruta foun sira ho objetivu atu hametin ita-nia instituisaun nia futuru, hodi garante kontinuidade no renovasaun hodi serve diak liu tan povu Timor-Leste,” dehan Prezidente Republika.
Xefe Estadu hatete, Importante atu sublina katak Governu, ho responsabilidade no hanoin didiak, suspende temporariamente prosesu atual rekrutamentu kadete nian hodi hatan ba dezafiu publiku sira no rekomendasaun sira hosi parseiru internasional sira no sosiedade sivíl.
Desizaun nee, foti ho transparensia no sentidu justisa, sei permite implementasaun prosesu selesaun foun neebe hametin kredibilidade, justisa, no konfiansa iha prosesu selesaun, hodi garante katak kandidatu hotu-hotu hetan avaliasaun ho rigorozu, justu no klaru.
“Nuudar ita selebra aniversariu PNTL nian ba dala 26, ita hafoun fali ita-nia kompromisu ba forsa polísia modernu, profisional neebe besik ba povu, no ita agradese ba ema hotu neebe kontribui ona ba nia dezenvolvimentu,” dehan PR Horta.
Xefe Estadu hatete kontestu no Preparasaun ba Futuru Selebrasaun nee mos akontese iha momentu importante ba konsolidasaun PNTL nian. Akontese tinan ida hafoin adezaun Timor-Leste nian hanesan Estadu-membru ba dala-11 hosi ASEAN, neebe formaliza iha loron 26 fulan-outubru tinan 2025, iha Kuala Lumpur.
Ida nee tama mos iha kontestu preparasaun nasaun nian hodi simu, ba dala uluk, Simeira Xefe Estadu no Governu sira ASEAN nian neebe marka ona ba tinan 2029, eventu ida neebe sei ezije padraun aas sira seguransa nian no koordenasaun nian iha setor hotu-hotu.
Preparasaun nee fo impaktu diretamente ba departamentu no unidade hotu-hotu PNTL nian, husi fronteira terrestre, tasi no aerea, iha prevensaun no kombate krime transfronteirisu, trafiku droga, trafiku armas, kontrabandu no trafiku umanu, too garantia pas sosial no estabilidade interna no komunitaria iha rai laran.
Nuudar parte ida hosi Pilar Defeza no Seguransa ASEAN nian, Timor-Leste reafirma nia kompromisu sira ba kooperasaun seguransa rejional, inklui fahe informasaun estratejika, halao ezersísiu konjuntu ho forsa polísia no militar sira iha rejiaun, hametin kapasidade jestaun krize no emerjensia, no promove aprosimasaun integradu hodi kombate ameasa transnasional sira.
“Kompromisu sira neebe ezije ita-nia atensaun hasoru terorizmu, krime sibernetiku no krime organizadu, no neebe reflete Timor-Leste nia determinasaun atu kontribui ba estabilidade no seguransa koletiva rejiaun nian, alina ho prinsípiu no prioridade sira ASEAN nian no garante katak PNTL (Polísia Nasional Timor-Leste) preparada tomak atu desempena knaar ida neebe ativu no responsavel iha kontestu rejional,” dehan PR Horta.
Aleinde ida-nee, esperiensia neebe PNTL hetan durante Konferensia Xefe Estadu no Governu CPLP nian ba dala-10, iha jullu 2014, no foin lalais nee hodi simu Altu Dignitariu Internasional sira konstitui marku importante sira iha ita-nia kapasidade institusional.
Destaka, hanesan ezemplu, vizita balu hosi Xefe Estadu ka Governu sira mai Timor-Leste, inklui Sua Santidade Papa Francisco iha setembru 2024 Sultan Brunei nian, Hassanal Bolkiah, iha maiu 2024 Prezidente Índia nian, Droupadi Murmu (11 agostu 2024) no Sekretariu-Jeral ONU nian, Antonio Guterres, sira nain-rua iha fulan-agostu 2024 Primeiru-Ministru Malazia nian, Anwar Ibrahim, iha setembru 2025 no Primeiru-Ministru Australia nian, Anthony Albanese, iha janeiru 2026, entre sira seluk.
(eme)
