DILI, STLTIMORLESTE.com – Prezidente Republika (PR), Jose Ramos Horta husu sidadaun hotu kuidadu natureza nomos uza bee kuidadu.
Prezidente Republika, Jose Ramos Horta hatoo kestaun nee liu husi nia diskursu bainhira partisipa iha selebrasaun Konferensia Akademika Refleksaun Nasional ba tinan 50 aniversariu Proklamasaun Indepedensia Timor Leste, iha salaun UNTL, Kaikoli, Dili, Kuarta (09/04/2025).
“Hau avizu ba ita hotu-hotu tau matan ba natureza, tau matan ba bee, se ita destroi no ita estraga bee arbiru no fakar bee arbiru, loke bee husi troteira fakar bee arbiru, no buat neebe ita halo laiha saneamentu entaun buat hotu experman, depois lixu mos ita soe arbiru iha mota laran sira liu-liu ba sira neebe mak hela iha mota ninin sira nee,” dehan PR, Horta.
Prezidente Republika hatutan, bainhira komunidade sira soe lixu arbiru, tempu udan lori ba tasi hafoer tasi no oho mos ikan sira iha tasi.
“Hafoer tasi no oho ikan, buat sira nee hau la koalia arbiru maibe hau estuda, no iha 2015 hau simu konvite hau ba iha Mianmar, Governu Japaun mak konvida hau ba koalia iha neeba kona-ba bee moos, no sira hotu kontente mai kaer liman ho hau,” dehan PR, Horta.
Nune mos konferensia boot ida iha Japaun iha tinan 2018, momentu neeba Prezidente ba laos hanesan Prezidente no Prezidente mak eis Prezidente Republika, Francisco Guterres Lú Olo, maibe tanba krize Parlamentu Nasional la fo autorizasaun ba iha Prezidente Republika Lú Olo atu partisipa.
“Buat ida hau hatete hau rezumu deit iha mundu tomak, 70% planeta, Terra, bee aqua mais sobre tudo husi be masin,” dehan PR, Horta.
Xefe Estadu hatete, tinan 10 liu ba Prezidente mos bolu atensaun ba Governu buka halo Gota bee para akapta udan been depois aproveita, hau klean no hau koalia makaas, maibe Governu la rona.
(eme)
