DILI, STLTIMORLESTE.com – Prezidente Republika (PR), Jose Ramos Horta iha esperansa tempu badak kazu Fujitivu Arnolf Teves Jr bele rezolvidu.
Prezidente Republika Jose Ramos Horta hatoo kestaun nee liu husi konferensia imprensa iha Palasiu Prezidensial Nikolao Lobato, Bairu Pite, Tersa (27/05/2025).
Prezidente Republika hatete, nia iha esperansa tempu badak parte justisa bele rezolve lalais kazu Fujitivu Arnolf Teves Jr sidadaun Filipina.
“Fujitivu Arnolf Teves Jr Filipina neebe iha Timor tinan ida resin ona, hau espera katak iha tempu badak kazu nee rezolvidu, ita boot sira rona tan orsida karik ba kazu ida nee. Iha justisa nia liman, iha Prokurador Jeral Republika nia liman, autoridade polísia sira nia liman,” dehan Prezidente Republika.
Prezidente Republika Jose Ramos-Horta hatete, razaun interese nasional, Timor-Leste lakohi eis-deputadu Filipinu Arnolfo Teves Jr iha rai laran.
Prezidente dehan, la haree ba konsiderasaun legal no konstitusional hotu-hotu, iha kestaun ida neebe nasaun hotu-hotu iha mundu observa, interese nasional,” dehan xefe Estadu.
Prezidehan dehan, interese nasional mak buat neebe impoin, buat neebe determina no iha kazu ida nee la interese ba ema ida ho natureza neeba, hodi impede Timor atu labele sai hanesan paraízu ida ba sira hotu neebe komete krime iha rejiaun nee.
Antes nee Tribunal Rekursu deside ona iha fulan Marsu hodi la fo estradisaun ba Arnolfo Teves Jr. ba Filipina. No Filipinu kaer iha tinan liu ba iha Díli husi Polísia Sientífiku Investigasaun Kriminal Timor Leste nian, iha sekuensia husi mandadu kapturasaun husi Interpol neebe fo sai tanba pedidu husi autoridade sira Manila nian.
(eme)
