DILI, STLTIMORLESTE.com – Prezidente Republika (PR), Jose Ramos Horta ofisialmente inaugura ou loke ona Kafetaria Kafé Atsabe.
Iha loron Domingu (31/08/2025) Prezidente Republika, Jose Ramos Horta ofisialmente loke ona Kafetaria Kafé Atsabe neebe lokaliza iha Area Kristu Rei Dili, nunee bele halao atividade hanesan babain.
Iha biban nee Prezidente Republika hatoo kongratulasaun ba nain Kafé Atsabe neebe ho esforsu bele harii fali iha Kristu Rei.
“Felisita Mariano Alves konesidu ho naran Ameta no ekipa, ba esforsu no dedikasaun hodi harii Kafé Atsabe, destaka importansia husi inisiativa atu haforte setor privadu, dinamizmu ekonomia nasional no promosaun turístiku Timor-Leste,” dehan Horta.
Prezidente Ramos-Horta hatoo ninia rekonesimentu ba Governu, liu-liu ba Primeiru Ministru, Kay Rala Xanana Gusmão hamutuk ho Ministeriu Obras Públika no Ministeriu relevante sira, neebe deside fatin restaurante iha Cristo Rei hodi fo ba Kafee Atsabe nuudár kompensasaun ba Kafé Atsabe iha Mota Ninin Komoro neebe sobu iha fulan hirak liu ba.
Antes nee Prezidente Republika mos promove kafee Timor iha mundu, bainhira ba hasoru Sua Santidade Papa Francisco iha Vatikanu, hodi entrega mos Kafé Timor ba Sua Santidade.
Prezidente mos husu komunidade sira nafatin halo produsaun ba kafé, no husu komunidade sira labele oho kafé laku, tanba nia folin karun iha Singapura no nasaun seluk ,tanba nee nafatin iha vontade hodi kuda no kuidadu kafé nee.
Jornalista: Emerenciana Pinto
Editora: Domingas Gomes
