DILI, STLTIMORLESTE.com – Prezidente Republika (PR), Jose Ramos Horta inspira no fahe mos hanoin no esperiensia ba juventude Monako, iha biban nee PR Horta konvida mos Prinsipe Albert II atu vizita Timor Leste (TL).
Prezidente Republika Jose Ramos Horta partisipa iha dialogu interjerasional ida ho joven monegasku sira hanesan parte ida husi selebrasaun sira neebe marka aniversariu ba dala 20 husi Fundasaun ba Pas Atraves Dialogu (FPCD) no aniversariu ba dala 10 husi ninia delegasaun Monako nian.
Tuir komunikadu neebe STL asesu kinta nee (26/06/2025) hatete, eventu neebe halao iha Sentru Konferensia Fundasaun Filantropiku Stelios, halibur estudante no joven sira maizumenus nain 40 husi Monako ho patrosiniu husi Prinsipe Albert II husi Monako.
Iha dialogu neebe modera husi Muriel Bubbio, Prezidente Ramos Horta fahe hanoin sira husi nia esperiensia nuudar ativista, negosiador, no lider ba nasaun ida neebe hetan dame liu husi dialogu. Prezidente Ramos Horta sublina papel transformador husi juventude hodi harii mundu ida neebe justu liu, sustentavel no pasifiku liu, hodi destaka Timor Leste nia modelu rekonsiliasaun, autodeterminasaun, no esperansa.
Prezidente enkoraja partisipante joven sira atu hola papel ativu hodi promove dame, justisa sosial, no direitus umanus.
Atividade nee inklui meza redonda ho partisipasaun g7+, neebe hafoun kompromisu sira ba Memorandu Entendimentu 2022 no anunsia kriasaun “Livru Reseita ba Pas” neebe hatudu hahan tradisional husi nasaun membru sira hanesan simbolu dialogu interkultural nian.
Selebrasaun nee konklui ho Cocktail ida hodi fo omenajen ba Prezidente Ramos-Horta, iha neebe entrega premiu sira Gazelles de Monaco 2023 nian no fo sai kriasaun ofisial delegasaun FPCD Noruega nian, hodi marka fundasaun nia espansaun global neebe kontinua.
Prezidente Republika, halao vizita serbisu ida ba prinsipadu Monako husi loron 23 too 25 fulan-Junu, ho objetivu atu haforte diplomasia multilateral no haburas envolvimentu juventude timoroan iha nivel internasional nian.
Pontu importante iha vizita ida nee mak enkontru ho Sua Alteza Serenissima Prinsipe Albert II, iha neebe Prezidente Ramos Horta aprezenta informasaun abranjente kona-ba progresu dezenvolvimentu Timor-Leste nian.
Iha oportunidade nee, Prezidente Ramos Horta destaka progresu neebe Timor-Leste hetan ona iha area pas no estabilidade, kompromisu forte ba protesaun ekosistema no biodiversidade tasi nian, hanesan mos estratejia sira neebe susesu atu fo impaktu ba turizmu, investigasaun sientifika no investimentu estranjeiru. Prezidente mos sublina Timor-Leste nia esperiensia iha konstrusaun no dezenvolvimentu sustentavel neebe uniku.
Durante dialogu produtivu ida-nee, Prezidente hatoo konvite formal ida ba Prinsipe Albert II atu vizita Timor-Leste, ho sujestaun iha fulan-novembru tinan 2026 neebe sei diskute hela. Principe Alberto II, neebe mak defende firme prinsipiu sustentabilidade ambiental, hatudu apresiasaun boot ba progresu Timor-Leste, liu-liu nia kompromisu ba konservasaun meiu-ambiente.
Ajenda sira iha Monako, inklui enkontru diplomatiku sira ho nivel aas no inisiativa ba foin-sae sira, sublina Timor-Leste nia papel proativu iha palku global no nia kompromisu atu fahe esperiensia sira ba dezenvolvimentu nian enkuantu aprende husi parseiru internasional sira.
(eme)
