DILI, STLTIMORLESTE.com – Prezidente Republika (PR) Jose Ramos Horta hasoru malu ho Kardeal Tolentino de Mendonça, hodi reafirma dame liu husi kultura no edukasaun.
Iha ninin husi Gala prestijiozu Premiu Zayed ba Fraternidade Umana 2026, Prezidente Republika Jose Ramos Horta halao enkontru badak maibe signifikativu ho Sua Eminensia Kardeal Jose Tolentino de Mendonça, Reprezentante Santa Se no Prefeitu Dikasteriu ba Kultura no Edukasaun.
Tuir Komunikadu neebe STL asesu Sesta (06/02/2026) hatete, sorumutu nee halao iha Founders Memorial, Abu Dhabi, iha neebe dignitariu nain-rua nee halibur hamutuk hodi onra esforsu global sira hodi fustera ligasaun umana no rekonsiliasaun.
Durante sira nia koalia, Prezidente Ramos Horta no Kardeal Tolentino de Mendonça emfatiza katak edukasaun no kultura mak pilar esensial sira hodi lori dame neebe dura no hodi salvaguarda dignidade umana.
Sira diskute importansia vital husi dialogu interkultural no interrelijiozu, hodi nota katak elementu sira nee fundamental hodi kria mundu ida neebe armoniozu liu tan.
Nuudar Laureadu Nobel ba Dame, Prezidente fo destake oinsa valor sira nee alina perfeitu ho Timor Leste nia identidade nasional no ninia kompromisu ba misaun global fraternidade umana nian.
Enkontru nee sublina relasaun neebe klean entre Timor-Leste no Santa Se, liuliu iha sira nia advokasia hamutuk ba prinsípiu sira neebe hakerek iha Dokumentu kona-ba Fraternidade Umana.
Prezidente Republika Jose Ramos Horta partisipa iha serimonia prestijiozu Premiu Zayed ba Fraternidade Umana 2026 neebe halao iha Founders Memorial, Abu Dhabi.
Serimonia nee prezide husi Sua Alteza Sheikh Mohamed bin Zayed Al Nahyan, Prezidente Emiradu Arabe Unidu, neebe halibur mos lider global sira, inklui Prezidente Azerbaijão no Primeiru Ministru Armenia.
Eventu nee marka selebrasaun tinan hitu ba asinatura Dokumentu kona-ba Fraternidade Umana, manifestu istoriku ida ba pas neebe Timor Leste sai nasaun primeiru iha mundu neebe adota formalmente ba valor nasional sira.
Edisaun premiu 2026 nian, neebe fo premiu osan US$ 1.000.000, onra manan nain sira neebe sira nia moris hatudu espíritu aten barani no kompaixaun. Manan-nain sira mak Prezidente Ilham Aliyev husi Azerbaijão no Primeiru-Ministru Nikol Pashinyan husi Armenia ba sira nia akordu ba pas istoriku, Zarqa Yaftali ba ninia advokasia ba edukasaun labarik feto sira iha Afganistão, no Palestinian Cooperation Foundation ba sira-nia serbisu umanitariu durante tinan 40 resin.
Iha serimonia nee, Sua Alteza Sheikh Mohamed bin Zayed Al Nahyan emfatiza katak asaun husi manan-nain sira sai hanesan naroman ba kooperasaun internasional no ba prezervasaun dignidade umana.
(eme)
