DILI, STLTIMORLESTE.com – Prezidente Republika (PR), Jose Ramos Horta komfere Ondra estadu Timor Leste nia ba Diplomata sira Singapura nia.
Iha loron Segunda (16/03/2026) Prezidente Republika Jose Ramos Horta komfere ondra estadu TL ba diplomata husi Singapura nuudar rekonhesimentu ba sira nia servisu esepsional no kontribuisaun signifikativa ba nasaun nia dezenvolvimentu no integrasaun rejional, Prezidente no konfere onra estadu Timor Leste nian ba distintu diplomata nain rua husi Republika Singapura.
Iha biban nee, Prezidente Ramos Horta kondekora Kolar Orden Timor Leste nian ba Embaixador Estraordinariu no Plenipotensiariu Republika Singapura nian ba Timor-Leste, Hu Yee Cheng (Robin), tuir Dekretu Prezidente Republika No.26/2026.
Simultaneamente, Prezidente Ramos-Horta kondekora Medalla Meritu ba William Chik Kam Weng, Enkarregadu Negosiu Embaixada Republika Singapura iha Timor Leste, tuir Dekretu Prezidente Republika No.27/2026. Serimonia nee halao iha Palasiu Prezidensial Nicolau Lobato.
Orden Timor Leste mak nasaun nia onra aas liu, rezerva ba individual sira neebe halao ona servisu esepsional no meritu ba nasaun.
Embaixador Robin Hu halao knaar nuudar Embaixador Naun-Rezidente Singapura nian ba Timor Leste dezde fulan Fevereiru 2023, períodu ida neebe marka ho aprofundamentu signifikativu ba relasaun bilateral sira. Pasu xave ida durante nia mandatu maka estabelesimentu Embaixada rezidente dahuluk Singapura nian iha Dili iha fulan-Abril 2024, ho William Chik nomeadu nuudar Enkarregadu Negosiu hodi lidera misaun nee.
Embaixador Hu dezempena papel instrumental hodi haburas kolaborasaun signifikativu entre Singapura no Timor-Leste iha setor oioin, inklui dezenvolvimentu ekonomiku, kapasitasaun, no interkambiu povu ba povu. Chik nia prezensa iha terrenu maka importante tebes hodi komplementa esforsu sira-nee, mantein kontaktu regular ho ofisial lokal sira, no asegura implementasaun susesu hosi inisiativa sira neebe konkorda ona.
Iha sira-nia lideransa konjunta, relasaun bilateral sira buras, marka ho aumentu notavel iha interkambiu sira iha nivel aas. Hirak-nee inklui Prezidente Jose Ramos-Horta nia vizita sira ba Singapura iha 2024 no 2025, Primeiru-Ministru Xanana Gusmão nia vizita ofisial iha fulan-Julhu 2025, no vizita husi Vise-Primeiru-Ministru Francisco Kalbuadi Lay iha fulan-Outubru 2024. Momentu ida nee retribuidu ho vizita ofisial hosi Ministru Negosius Estranjeirus Singapura nian, Vivian Balakrishnan, mai Timor Leste iha fulan Julhu 2023, no vizita husi Ministru Negosius Estranjeirus no Kooperasaun Timor-Leste nian, Bendito dos Santos Freitas, ba Singapura iha fulan Junu 2024.
Embaixador Hu no Chik mos sai hanesan instrumental iha implementasaun susesu husi programa xave sira kapasitasaun nian, hanesan pakote Singapore-Timor Leste ASEAN Readiness Support (STARS) ka Pakote Apoiu Prontidaun Singapura-Timor Leste nian ba ASEAN no Apoiu Haforsa STARS (eSTARS). Implementa tuir Programa Kooperasaun Singapura nian, inisiativa hirak-nee fo asesu krusial ba ofisial Timoroan sira ba formasaun relasiona ho ASEAN, oferese apoiu valiozu ba Timor Leste nia adezaun ba ASEAN iha Simeira ASEAN ba dala 47 iha fulan-Outubru 2025 no loke dalan ba ninia viajen kontinua ba integrasaun tomak.
Prezidente Republika Jose Ramos-Horta liu husi diskursu iha palasiu Prezidensial Nicolau Lobato Segunda 16/03 elojia dedikasaun husi diplomata nain rua nee, hodi haktuir Embaixador Robin Hu no Enkarregadu Negosiu William Chik presta ona servisu sira ho valor aas liu ba povu Timor Leste.
“Sira-nia esforsu dedikadu laos deit hametin lasu amizade entre ita-nia nasaun sira maibe fo mos apoiu tanjível ba ita nia dezenvolvimentu nasional no ita-nia viajen ba integrasaun tomak iha família ASEAN. Ho onra sira-nee, Estadu rekonese sira-nia kontribuisaun signifikativu no permanente ba ita-nia bem-estar no progresu,” dehan PR Horta.
Kolar Orden Timor Leste nian atribuidu ba kontribuisaun estraordinariu sira ba nasaun, enkuantu Medalla Meritu rekonese servisu signifikativu hodi hametin orden sosial no estabilidade nasional. Konferensia onra sira-nee ba Embaixador Hu no Chik sublina Singapura nia kompromisu neebe dura ba Timor Leste nia futuru no relasaun forte no amigavel entre nasaun rua nee.
(eme)
