DILI, STLTIMORLESTE.com – Prezidente Republika (PR), Jose Ramos Horta komprende dezafiu neebe media haat (4) hanesan STL, Timor Post, Indepedente no Dili Post hasoru, tanba nee tempu badak sei garantia hodi fo apoiu nunee bele tulun media 4 nia publikasaun ba oin nafatin.
Ho dezafiu neebe media 4 hasoru, iha fulan kotuk lideransa husi media 4 hatoo ba Prezidente Republika, no ohin Prezidente Republika Jose Ramos Horta bolu fila fali media 4 hodi aktualiza katak iha tempu badak Alexander Soros, Prezidente Konselhu Open Society Foundations (OSF) sei fo apoiu ba media 4 nee.
Bainhira remata hasoru malu, Portavos Jose Xarito Amaral ba jornalista sira iha Palasiu Prezidensial Nicolau Lobato, Bairo Pite, Kuarta nee (25/03/2026) hatete, ohin mai hasoru malu ho Prezidente Republika Jose Ramos Horta, tanba Prezidente mak konvida hodi aktualiza fila fali pedidu neebe antes nee media 4 hatoo ba Prezidente Republika.
“Ohin Prezidente Republika bolu ami nain haat husi media haat Timor Post, STL, Dili Post no Indepente mai halo konfirmasaun kona-ba ami nia pedidu neebe uluk ami hatama fulan hira ba kotuk, ohin ami mai, grasa adeus pedidu neebe hatama rezultadu pozitivu, apoiu husi Konselhu Open Society Foundations (OSF) iha tempu badak ita sei halo serimonia ida oinsa selebra apoiu nee, tanba nee ohin mai aktualiza ho kontente agradese ba nain Prezidente,” dehan Portavos.
Iha biban nee, husi parte media 4 hatoo agradese ba Prezidente Republika neebe ho laran luak bele buka dalan oin-oin hodi koalia ho Prezidente Konselhu Open Society Foundations (OSF), ikus bele iha rezultadu pozitivu no tempu badak sei apoiu ba media 4.
Nia hatete, depois ukun aan foin iha istoria ida husi Prezidente Republika neebe hatudu ba media nasional 4 neebe eziste iha Timor Leste nee, no agradese mos ba apoiu sira seluk husi ekipa Prezidensia nian.
Iha oportunidade nee, media haat mos hatoo agradese ba Prezidente Konselhu Open Society Foundations (OSF) neebe ho laran luak tebes hodi fo apoiu ba media haat nee, tanba haree situasaun media haat hetan ameasa.
“No tinan ida nee mos ami redus staf, ami redus salariu staf sira nian, maibe ohin bele rona rezultadu diak hodi bele rekupera no salva media haat iha futuru,” katak nia.
Iha tinan kotuk (22/10/2025) media nasional haat kompostu husi Media Suara Timor Lorosae (STL), Timor Post (TP), Dili Post (DP) no Independente hatoo preokupasaun neebe mak sira hasoru ba Prezidente Republika (PR), Jose Ramos Horta. Iha hasoru malu nee Prezidente Republika promete katak sei apoiu media haat nee iha tempu besik, maibe sei haree mos ba orsamentu husi Prezidensia Republika nian.
Ho preokupasaun neebe media haat hasoru iha vizita Estadu ba Suisa, ho oportunidade nee Prezidente Ramos Horta hasoru malu ho Prezidente Konselhu Osf Alexander Soros atu garante apoiu ba media Timor-Leste.
Prezidente Republika hasoru malu ho Alexander Soros, Prezidente Konselhu Open Society Foundations (OSF) iha ambitu husi Forum Ekonomiku Mundial iha Davos, Suisa. Iha sorumutu nee, Prezidente hatoo ninia agradesimentu ba apoiu durante dekada barak neebe fundasaun nee no ninia fundador, George Soros fo ona, neebe kleur ona defende valor demokratiku sira no liberdade imprensa nian iha Timor Leste no mos iha mundu tomak.
Foku prinsipal husi diskusaun nee mak dezafiu sira neebe setor mídia 4hasoru agora iha Timor Leste. Prezidente Ramos Horta entrega rasik karta husi media 4 nee esplika ho detalhu sira nia difikuldade, no fahe dokumentu nee direta ba Sr. Soros liuhusi WhatsApp.
Ho resposta neebe pozitivu ba Prezidente ninia advokasia, Prezidente Konsellu OSF nee kompromete atu fo apoiu hodi hametin kbiit mídia nian no proteje liberdade imprensa.
(eme)
