DILI, STLTIMORLESTE.com – Prezidente Republika (PR), Jose Ramos Horta kondekora atleta sira Timor Leste nian neebe sei partisipa iha jogu Sudeste Aziatiku ho medalha meritu.
Iha loron Tersa, Prezidente Republika, Jose Ramos Horta kondekora Medalha Meritu no Sertifikadu Elojiu ba atleta no treinador Timoroan sira neebe partisipa iha Jogu Sudeste Aziatiku (SEA Games).
Kondekorasaun nee fo sai liu husi dekretu lei neebe asina husi Prezidente Ramos Horta iha loron 8 fulan Abril tinan 2025.
Iha biban nee, Xefe Gabinete Prezidensia Republika Timor Leste, Jesuína Maria Ferreira Gomes, neebe reprezenta Prezidente Republika liu husi diskursu iha palasiu Prezidensial, Nicolau Lobato, Bairo Pite, Dili, Tersa nee (15/04/2025) hatoo kongratulasaun ba atleta sira.
Xefe Gabinete Prezidensia Republika Timor Leste, Jesuína Maria Ferreira Gomes aprezenta kondekorasaun nee iha serimonia ofisial neebe halao iha Palasiu Prezidensial Nicolau Lobato. Resipiente sira inklui reprezentante nain 5 husi Konfederasaun Desportu Nasional Timor Leste (CDTL), atleta 32 neebe kompete iha Bokse, Shorinji Kempo, Karate-do, no Taekwondo, no treinador 15 neebe orienta atleta sira nee ba susesu.
Medalha Meritu nee rekonhese realizasaun exelente husi atleta Timoroan sira neebe reprezenta Timor Leste iha kompetisaun desportu internasional no lori rezultadu esepsional ba nasaun.
Reprezentante sira tuir mai husi Konfederasaun Desportu Timor-Leste (CDTL) mak simu Medalha Meritu Macario Floriano Sanches, Reprezentante husi Konfederasaun Desportu Timor Leste, Miguel Marques Gonçalves Manetelu, Reprezentante husi Modalidade Shorinji Kempo, João Jose Fernandes, Reprezentante husi Modalidade Bokse, Filomeno Soares de Araujo, Reprezentante husi Modalidade Karate-do, Gabriel J. M. F. de Jesus da Costa, Reprezentante husi Modalidade Taekwondo.
Atleta nain neen ho Medalla Osan-Mean husi modalidade Shorinji Kempo neebe simu Medalla Meritu nian mak Antonio Manuel, Brígida Nívia M.L. Savio, Julianto Pereira, Silviana de Jesus Carvalho, Dorceyana Borges, Lola Caldas da Silva da Costa.
Aleinde nee, atleta nain ruanulu-resin-neen no treinador sanulu-resin-lima simu Sertifikadu Elojia ba sira-nia kontribuisaun no realizasaun exelente.
Iha diskursu Prezidente nian neebe lee husi Xefe Gabinete, Prezidente Ramos-Horta hateten atleta sira nuudar embaixador Timor Leste nian iha palku global.
“Medalla Meritu sira nee laos deit onra exelensia atletika, maibe maibe ita boot sira nia personifikasaun ba ita-nia espíritu nasional. Liu husi imi-nia dedikasaun no dignidade iha kompetisaun, imi hatudu ba mundu se mak ita nuudar povu ida. Desportu hametin ita hamutuk liu husi diferensa no inspira ita-nia juventude atu mehi ho aten-brani bainhira ita harii Timor Leste ida neebe realizasaun atletika hametin unidade nasional no pas,” dehan Sejuina.
Serimonia nee reprezenta nasaun nia agradese ba atleta sira nee. Liu husi sira-nia dedikasaun, dixiplina, no realizasaun, sira hasae ass ona bandeira Timor Leste aas no hatudu espíritu indomavel povu Timor Leste nian, aira nia susesu reflete nasaun nia forsa no determinasaun neebe buras ba beibeik iha palku mundial, sai nuudar inspirasaun ba sidadaun Timoroan hotu bainhira nasaun nee kontinua harii nia demokrasia joven.
(eme)
