DILI, STLTIMORLESTE.com – Prezidente Republika (PR), Jose Ramos Horta kondekora no fo sertifikadu rekonhesimentu ba entidade sira neebe organiza ho masimu durante preparasaun vizita Sua Santidade Papa Francisco mai Timor Leste (TL).
Iha biban nee Prezidente Republika Jose Ramos Horta liu husi nia diskursu iha Palasiu Prezidensial Nikolao Lobato, Bairo Pite, Kinta nee (04/09/2025) hatete, entidade sira nee servisu diak tebes, mobiliza diak iha vizita Sua Santidade Papa Francisco nian mai TL iha tinan kotuk, nee eventu boot tebes iha istoria TL.
“Vizita Sua Santidade Papa Francisco nia vizita mai TL eventu neebe boot tebes iha istoria Timor Leste nia hanesan Amu Papa João Paulo II nia vizita no Papa Francisco mai preparasaun nee todan tebes, tempu ita bele hatete badak, agradese ba lideransa Maun Xanana nia desizaun no pratika, atitude neebe tun ba kampu loron kalan too ba kampu haree ba ezekusaun iha fatin, dala ruma nia hader iha tuku 4 dader no tuku 6 dader nia iha fatin ona, momentu neeba hau rasik nuudar Prezidente preokupadu los, tanba vizita Papa Francisco nian ita konta ema rihun atus hitu mak partisipa,” katak PR Horta.
Prezidente Republika hatete, iha tempu neeba Prezidente mos preokupa oinsa mak buka fatin ema haris no toba depois sintina, bee moos, ba labarik sira, inan sira, katuas sira, tanba serimonia nee laos oras ida ka oras rua, maibe loron tomak, balun mai husi foho oinsa prepara hahan no seguransa.
“Seguransa laos deit seguransa baibain, maibe seguransa rigor, ezemplu ema balun hakfodak ba buat ruma hanesan samea ka buat ruma akontese, ida deit hakilar rua tan nain 10 tan ida komesa halai nee provoka, hau preokupa ba ida nee, tanba eventu barak oin-oin iha Jakarta (Indonezia) tinan 1 ka tinan 2 antes iha jogu footbal ida iha ema ruma hakilar halai hotu-hotu halai ema atus ida resin mate, buat sira nee hotu ita hanoin, nomos hotel, maibe buat hotu lao ho diak,” dehan PR Horta.
Prezidente Republika hatutan, iha eventu nee Prezidente Republika tuur ho Amu Papa haree sarani barak tebes mak partisipa no Amu Papa ho emasaun boot.
“Hau rasik hakfodak ho povu nia partisipasaun, Amu Papa sai mos ho emasaun boot, hau despede nia iha Aeroporto molok nia tama ba aviaun nee nia para oituan hatete ba hau, tau matan didiak ba povu diak ida nee, nia hatete hau nunka simu resepsaun ida diak laos Amu Papa ba fatin ida ema la simu ema juta simu nia maibe ida nee oin seluk los, laos tanba numeru ema barak maibe tanba intresidade, emosaun, reliziosidade nee mak Amu Papa sente liu,” dehan PR.
Xefe Estadu hatete, Amu Papa atual Leão simu informasaun kompletu husi Amu Papa Francisco nia vizita, no Amu Papa mos akompanha programa husi Prezidente bainhira ba hasoru Amu Papa Francisco ofisial iha Roma.
Entidade neebe mak simu kondekorasaun no simu sertifikadu rekonhesimentu husi Prezidente Republika Jose Ramos Horta mai husi Ministeriu oin-oin, husi Governu, inklui Padre no Madre neebe organiza evenetu vizita Sua Santidade Papa Francisco iha TL.
Jornalista: Emerenciana Pinto
Editor: Xisto Mendonça
