DILI, STLTIMORLESTE.com – Prezidente Republika (PR), José Ramos Horta kongratula Kanseler Alemaun neebe foin eleitu Friedrich Merz.
Ramos Horta hatoo nia felisitasaun kmanek ba Friedrich Merz ba nia eleisaun nuudar Kanseler Republika Federal Alemana nian iha loron 6 fulan-Maiu tinan 2025.
Kanseler Friedrich Merz halao knaar nuudar Líder ba Uniaun Demokratika Kristaun dezde fulan Janeiru 2022, lidera Grupu Parlamentar Uniaun Demokratika Kristaun nian hanesan Líder Opozisaun iha Bundestag husi Fevereiru 2022 too Maiu 2025. Iha loron 6 fulan-maiu tinan 2025, Merz eleitu nuudar Kanseler Repiblika Federal Alemanha nian.
Iha karta felisitasaun diriji ba líder Alemaun foun Kuarta kalan (07/05/2025) Prezidente Ramos Horta hatoo felisitasaun Kmanek ba eleisaun.
“Hau hakarak hatoo ba Sua Exelensia hau nia felisitasaun kmanek ba Ita-boot nia eleisaun, iha loron 6 fulan-maiu tinan 2025, nuudar Kanseler Republika Federal Alemana nian. Ita Boot nia eleisaun ba lideransa ekonomia boot liu iha Europa refleta konfiansa neebe tau ba Ita-Boot nia vizaun,3 perseveransa, no abilidade atu lidera nasaun iha tempu neebe partikularmente dezafiante ba Alemaña, Europa, no mundu. Ami fiar katak ho Ita-Boot nia lideransa, Alemaña sei kontinua halao papel esensial hanesan pilar ida estabilidade nian no forsa motriz ba koezaun iha Uniaun Europeia no iha orden internasional em
jeral,” dehan PR Horta.
Prezidente Ramos Horta sublina valor klean neebe Timor-Leste atribui ba ninia amizade no kooperasaun ho Republika Federal Alemaña, bazeia ba prinsípiu konjuntu kona-ba respeitu ba direitus umanus, autodeterminasaun povu sira-nian, no dezenvolvimentu sustentavel.
Timor Leste reafirma ninia prontidaun tomak atu hametin liu tan relasaun ida nee iha area oioin neebe iha interese ba malu, tantu nivel bilateral no multilateral.
Prezidente Ramos Horta konklui ninia mensajen ho votos susesu ba Kanseler Merz, governu foun Alemaña nian, no povu Alemanha.
(eme)
