DILI, STLTIMORLESTE.com – Prezidente Republika (PR), Jose Ramos Horta hatoo kongratula ou parabens ba Nilton Gusmão, tanba reafirma estadu nia kompromisu atu dezenvolve ajenda futebol nasional liu husi parseiru internasional sira.
Prezidente Republika Jose Ramos Horta hatoo kestau nee bainhira simu delegasaun futebol nivel altu ou Membru Konselhu FIFA, Tan Sri Dato Haji Hamidin no Prezidente Federasaun Futebol Timor Leste (FFTL), Nilton Gusmão dos Santos, iha Palasiu Prezidensial Nicolau Lobato, Domingu loraik (08/02/2026).
Enkontru nee sai hanesan plataforma vital ida atu diskute futuru desportu nian iha rai-laran hafoin susesu husi Kongresu FFTL.
Iha hasoru malu nee Prezidente Republika Jose Ramos Horta hatoo parabens ba Nilton Gusmao, “parabens ba Nilton Gusmão no reafirma Estadu nia kompromisu atu dezenvolve ajenda futebol nasional liu husi parseira internasional sira,”.
Iha hasoru malu nee foku sentral husi diskusaun sira nee mak kona-ba urjensia dezenvolvimentu infraestrutura moderna, liu-liu konstrusaun estadiu nasional foun ida neebe tuir padraun internasional FIFA nian.
Iha biban nee Tan Sri Dato Haji Hamidin haktuir katak, FIFA, AFC no AFF servisu hamutuk hodi koordena hodi konkretiza projetu nee, neebe ikus mai sei fo oportunidade ba Timor Leste atu sai uma nain ba jogu internasional sira.
Aleinde nee, delegasaun nee mos diskute kona-ba planu provizoriu ba Prezidente FIFA, Gianni Infantino, atu vizita Timor Leste iha fulan Agostu tinan nee hodi hametin liu tan inisiativa dezenvolvimentu sira nee.
Iha biban nee Prezidente Ramos Horta hatoo agradesimentu klean ba apoiu tekniku no finanseiru neebe oferese husi komunidade futebol global, no promete kooperasaun total husi Prezidensia nian hodi garante katak projetu sira nee bele lao tuir planu.
Xefe Estadu sublina katak harii infraestrutura kualidade no investe iha programa sira ba foin-sae (grassroots) mak pasu esensial sira atu kumpre aspirasaun atleta Timoroan sira nian.
(eme)
