DILI, STLTIMORLESTE.com – Prezidente Republika (PR), Jose Ramos Horta kongratula Primeiru Ministru (PM) foun Kanada, Mark Carney neebe foin eletu.
Iha loron Kinta kalan (13/03/2025) Prezidente Republika Jose Ramos horta hatoo ninia felisitasaun ho laran kmanek ba Primeiru Ministru Kanada nian neebe foin eleitu.
Primeiru Ministru Carney nia kareira distintu nuudar ekonomista no servidor publiku, inklui mandatu nuudar Governador ba Banku Kanada no Banku Inglaterra, no mos ninia papel nuudar Enviadu Espesial Nasoins Unidas nian ba Asaun Klimatika no Finansa, reflete nia kompromisu neebe metin atu rezolve dezafiu global sira neebe kompleksu.
Iha karta felisitasaun ida neebe diriji ba Honoravel Primeiru Ministru Kanada nian, Sua Exelensia Mark Carney, iha loron 11 fulan Marsu tinan 2025.
“Hau hakarak hatoo hau nia felisitasaun ho laran kmanek ba Sua Exelensia nia eleisaun foin lalais nee nuudar Primeiru Ministru Kanada nian, hatudu konfiansa povu Kanada nian ba ita boot nia lideransa durante momentu importante ida nee iha asuntu global,” Katak nia.
Prezidente Ramos Horta sublina, fundasaun amizade neebe metin entre Timor Leste ho Kanada hodi afirma, “Ami apresia tebes Kanada nia apoiu kontinua ba ami nia nasaun, liu-liu iha ami nia prosesu integrasaun nuudar Estadu Membru tomak iha Asosiasaun Nasoins Sudeste Aziatiku (ASEAN) no ami nia envolvimentu neebe luan ho komunidade internasional. Ami reafirma ami nia kompromisu atu hametin liu tan lasus entre ita nia nasaun liu husi promosaun inisiativas kolaborativa iha area sira interese mutuu nian, inklui dezenvolvimentu ekonomiku, edukasaun no kooperasaun multilateral.” katak nia.
PR Horta dehan, Kanada no Timor Leste iha ona relasaun amizade no kooperasaun neebe bazeia ba valor komun sira kona-ba pas, demokrasia, direitus umanus no dezenvolvimentu sustentavel.
Prezidente Ramos Horta remata ninia mensajen ho dezeju kmanek ba susesu Primeiru Ministru nian hodi kumpri ninia knaar importante sira no lori prosperidade ba povu Kanada.
(eme)
