DILI, STLTIMORLESTE.com – Prezidente Republika (PR), Jose Ramos Horta sente kontente hetan nomeasaun nuudar Profesor Adjunta Honorariu iha Universidade Taylor, hodi fahe esperiensia ba estudante sira.
Prezidente Republika Jose Ramos Horta hetan nomeasaun nuudar Profesor Adjuntu Honorariu iha Universidade Taylor, iha ambitu ba programa Lisensiatura iha Filozofia, Polítika no Ekonomia (PPE) ho destinsaun.
Nomeasaun istoriku ida nee reprezenta momentu signifikativu ida iha esforsu sira universidade nian atu integra lideransa mundu real no perspetiva global sira iha ninia enkuadramentu akademiku, oferese ba estudante sira oportunidade uniku atu aprende husi ema neebe halo mudansa lo-loos.
Iha kualidade nuudar Profesor Adjuntu Honorariu, Prezidente Ramos Horta envolve ho estudante sira liu husi palestra sira kona-ba asuntu rejional no global kontemporaneu, bazeia ba Prezidente nia esperiensia klean nuudar líder polítiku no diplomata.
Prezidente nia kontribuisaun sira sei foka ba lideransa, governasaun, no dezenvolvimentu ekonomiku, hariku programa PPE ho perspetiva pratika inspiradora sira.
Bainhira simu nomeasaun, Prezidente Repuiblika liu husi komunikadu neebe STL asesu husi media Prezidensial Republika, Segunda nee (23/06/2026) hatete, edukasaun hanesan instrumentu aas.
“Edukasaun mak instrumentu ida neebe makaas liu neebe ita iha atu forma mundu ida neebe justu liu, kompaixaun no pasífiku liu. Hau sente onradu mai hamutuk iha Universidade Taylor no simu ho laran haksolok oportunidade atu fahe hau-nia esperiensia sira ho estudante sira,” dehan Prezidente Republika Ramos Horta.
Hamutuk ho nomeasaun Universidade Taylor introdus ona bolsa estudu, Prezidente Ramos-Horta hodi fo apoiu ba estudante Timor-oan ida neebe merese no ho meritu akademiku no kompromisu ba impaktu global.
Inisiativa ida nee reforsa universidade nia kompromisu ba edukasaun ida neebe asesivel no ho kualidade aas, hodi komplementa bolsa estudu liu millaun RM30 neebe oferese ba admisaun iha Setembru 2025.
Parseria nee promete atu hametin liutan lasu edukasional no kooperasaun entre Timor Leste no rejiaun Sudeste Aziatiku.
(eme)
