DILI, STLTIMORLESTE.com – Prezidente Republika (PR), Jose Ramos Horta kontinua buka tulun sidadaun neebe kondisaun ladun favoravel iha rai laran.
Prezidensia Republika liu husi Gabinete Servisu Sosiedade Sivil no Assuntu Sosial, foin lalais haree direta kondisaun moris família ida iha Tasi-Tolu (Danau-1) Dili. Neebe durante tinan ida ona família nee hela iha uma baraka kiik ho oan nain 5 kompostu husi oan feto nain 4 no mane nain 1, sira hotu sei otas kiik. Oan-feto primeiru naran bolu Paya ho tinan 10 no oan-feto segundu naran bolu Moko ho tinan 7, sira nai 2 lakon direitu atu asesu ba edukasaun hanesan mos nia maluk sira seluk, maibe sira tenke para estudu iha eskola primaria ho razaun família kbiit la too. Oan nai 3 sira seluk sei otas kiik, oan mane ida hela ho nia inan-aman no oan feto nain 2 hela ho nia avo sira iha foho.
Tuir Komunikadu neebe mak STL asesu Segunda (07/07/2025) hatete, iha Timor Leste, situasaun sosial-ekonomiku lao ho dezafiu barak.
Ema barak hela iha kondisaun moris neebe seidauk dignu, inklui família balun neebe hela iha uma baraka, tanba seidauk asesu ba uma permanente, bee, alimentu, elektrisidade, edukasaun no seluk tan. Biar ho situasaun hanesan nee, maibe mai mos ho esperansa neebe nafatin moris husi ema balun neebe hakarak fo tulun ruma, iha mos lideransa neebe sente no responde ba situasaun ida nee.
Prezidente Republika Jose Ramos Horta kontinua halo efikasia Sosial oin-oin hodi defende direitu baziku ba ema hotu, espesialmente ba família sira neebe ho kbiit naton. Nia kontinua hatudu preokupasaun boot ba família kbiit naton neebe hela iha uma baraka, seidauk hetan naroman husi eletrisidade, alimentu nst.
Tanba nee Prezidente Ramos Horta liu husi Gabinete Servisu Sosiedade Sivil no Assuntu Sosial, foin lalais haree direta kondisaun moris família ida iha Tasi-Tolu (Danau-1) Dili. Neebe durante tinan ida ona família nee hela iha uma baraka kiik ho oan nain 5 kompostu husi oan feto nain 4 no manee ida, sira hotu sei otas kiik.
Iha biban nee Robino Florival do R. Madeira, nuudar aman ida iha responsavel boot, kontinua esforsu makaas no buka meus oin-oin hadi bele sustenta família nee nia prekupasaun, dalan ida mak servisu nuudar Lixeiru iha Tibar.
“Hau hodi tetu sasan sira nee mak, hetan osan hodi sosa fos no modo ba labarik sira han, semna ida paling hetan mak US$ 5-10, sasan balun haree ba diak nee lori mai uma hodi uza fali, lona balun diak nee mak halo ba didin uma nee,” hateten Robino Florival.
Lixu bele sai problema, maibe iha liman neebe badinas no servisu bele sai solusaun ida. Nee mak realidade no inspira husi Robino Florival do R. Madeira. Loron-loron, nia tenke koleta lixu (Besi aat, masa, kalen, lata nst.) ida nee ba nia hanesan koleta esperansa ida ba nia família, tan husi nee mak nia hetan osan hodi Sosa fos, modo ruma ba nia oan no família.
Banhira ekipa Gabinete Prezidensia Republika halao vizita ba família nee, hodi fo tulun ruma no rona sira nia prekupasaun.
Iha dadalia, família ho matabeen agaradese ba ekipa Prezidensia Republika nia tulun. Francisca dos Santos Bareto, nuudar inan prekupa mos ba oan sira nia futuru ida iha família nee ho matabeen monu no hateten.
“Ita bele moris ho kondisaun aat ba mos ita nia oan sira tenke ba eskola, tanba futuru nee sira nian” hateten Francisca dos Santos Bareto.
Família agradese tanba Prezidente Republika Ramos Horta ho inisiativa rasik, orienta ekipa Gabinete Prezidensia bele mai haree direta sira nia kondisaun, sei tulun mos sira nia prekupasaun nesesidade kada fulan no sei hatama oan feto nain 2 ba eskola iha orfanatu madre sira nian.
Koordenadora Jeral Gabinete Servisu Sosiedade Sivil no Assuntu Sosial, Teresa Dos Santos Ximenes ho ekipa, enkoraja família nee hodi Prezidente Ramos Horta nia naran, sei tulun nafatin família nee no lori sustenta oan sira bele asesu ba edukasaun.
“Ita nia Prezidente, saida mak nia haree no sente mak mak nia haruka hela ami mai, lori ita nia prezidente nia naran apoiu netik esesidade oituan, pois ajuda tan ama-apa Nia oan feto nain 2 ba hela iha madre sira hodi bele ba eskola, nee para hamenus todan neebe durante nee família sente” hateten Teresa Dos Santos Ximenes.
(eme)
