DILI, STLTIMORLESTE.com – Prezidente Republika (PR), Jose Ramos Horta louva koru joven Australia no konvida sira atu vizita Timor Leste (TL), hodi komemora tinan 50 migrasaun Timoroan nian.
Prezidente Republika, Jose Ramos Horta, tuir atuasaun kultural espesial ida husi Koru Eskola Boite nian iha Australia, hodi komemora tinan 50 migrasaun Timoroan nian.
Vizivelmente emosionadu ho koru nia interpretasaun ba knananuk timoroan sira, Prezidente elojia artista joven sira ba sira nia atuasaun magnífiku, hodi bolu ida nee hanesan ida neebe diak liu husi neebe nia rona durante nee.
Iha ninia diskursu, Prezidente Republika, Ramos Horta hatoo ninia agradesimentu klean ba relasaun kleur no afetuoza entre povu Timor-Leste no Australia, hodi destaka eventu nee nuudar símbolu forte ba relasaun kultural neebe metin entre nasaun rua nee.
Hodi fahe mitu (Mitos) fundamental kona-ba Timor Leste nia orijen husi lafaek ida, Prezidente hatoo konvite ho laran pesoalmente ba estudante sira, sira-nia família, no komunidade Australia tomak atu vizita Timor Leste.
Xefe Estadu fo sai perspetiva emosionante atu bele semo diretu husi Melbourne ba Díli liu husi kompania aerea timoroan Aero Dili, neebe iha tempu badak sei halo viajen sira sai asesivel liu.
Prezidente Republika, Ramos Horta enkoraja audiensia sira atu esperiensia rasik Timor Leste nia kultura uniku no beleza natural, partikularmente epoka haree baleia ka whale-watching season espetakular.
Prezidente Republika nia konvite halo parte iha vizaun ida neebe luan liu atu hametin ligasaun ema ba ema no impulsiona turizmu, neebe haree hanesan vital ba dezenvolvimentu nasaun nian.
Xefe Estadu mos fahe detalhu kona-ba ninia inisiativa rasik hodi envolve ho juventude sira, inklui programa ida neebe simu labarik atus ba atus ba almosu gratuitu no halo atividade depois-eskola iha Palasiu Prezidensial.
Hodi enkoraja viajen no interkambiu kultural, Prezidente hakarak haburas jerasaun foun ho amizade no komprensaun mutua entre Timor Leste no Australia.
(eme).
