DILI, STLTIMORLESTE.com – Prezidente Republika (PR) Jose Ramos Horta la konkorda Governu seidauk halo reforma ba instituisaun Publiku (IP) nomos Empreza Publiku (EP) neebe ho osan boot, maibe servisu valor la lao.
Prezidente Republika ba jornalista sira iha Salaun Konventu Madre Alma Bebonuk Segunda (25/11/2024) hatete, maske Primeiru Ministru Kay Rala Xanana Gusmao rasik mos lamenta ho servisu IP-EP, maibe too oras nee Governu seidauk halo reforma.
Prezidente Republika husu IX Governu Konstitusional atu estuda didiak iha tinan 2025, tanba instituisaun EP-IP too oras nee servisu lalao maske simu salariu boot maibe eletrisidade kontinua mate lakan, bee mate moris, no lukru ba estadu laiha ida nee Governu presiza haree didiak.
“Hau ladun konkorda governu seidauk halo reforma makaas, tanba Primeiru Ministru mos preokupadu, ida nee instituisaun publika nee barak demais iha Timor Leste, hau hanoin ba ita nia ekonomia ita nia populasaun instituisaun publika deit hanesan governu lalika halo sira nia servisu instituisaun publika mak halo nee mak hau la konkorda, maibe laos orsamentu,” dehan Prezidente Republika.
Prezidente Republika husu Governu atu estuda didiak kona-ba IP-EP nia servisu iha tinan 2025, tanba iha Timor Leste instituisaun publiku no empreza publika barak tebes, maibe servisu lalao.
“Hau espera 2025 governu estuda nee didiak, tanba maun Xanana mos uluk hatete, instituisaun publika barak demais, no barak la servisu, servisu saida, eletrisidade mate moris, bee mate moris, farmasia medikamentu sempre problema, sira servisu saida. SERVE servisu saida, maibe prontu nee laos kestaun ida konstitusional, nee kestaun governasaun, Primeiru Ministru mak tenke haree nee ba oin,” katak PR Horta.
Xefe Estadu husu Governu atu halo estuda didiak nunee bele hamate tiha IP-EP maizumenus 50% liu, tanba iha rai seluk IP-EP hatama lukru ba estadu, maibe iha Timor Leste la lori luktu ba estadu no servisu la lao, ahi eletrisidade kontinua mate lakan no bee mate moris, ida nee servisu neebe la los, governu presiza haree ba kestaun sira nee.
“Hau kompriende 2025 seidauk, maibe durante 2025 devia estuda klean fali atu hamate tiha pelumenus 50% ka liu tan, rai nee kiik loos la presiza instituisaun publika. Hau esplika ba sira iha rai seluk instituisaun publika hanesan iha Portugal eletrisidade Portugal sira nia jestaun iha Portugal nee diak tebe-tebes, hatama osan boot ba estadu. Tanba nee konseitu mosu hanesan institutu publika atu iha jestaun nia rasik, jestaun hanesan privadu sira bobot iha mundu nee sira halo jestaun diak tebe-tebes, no hatama osan boot. Eletrisidade Timor nee hatama osan aat, inklui hospitál sira nia ekipamentu,” katak PR Horta.
Xefe Estadu hatete, foin lalais viajen ba iha Munisipiu Baukau mediku sira mos kestiona kona-ba servisu EDTL, tanba ahi eketrisidade mate lakan estraga hotu sasan neebe sosa ho osan boot liu-liu fasilidade hospital sira.
“Foin daudaun hau ba Baukau nee doutor sira iha Baukau nee hatete, tanba eletrisidade mate moris, ekipamentu hospitál Baukau neebe karun tebe-tebes estraga, no Hospita Nasional Guido Valadares mos nunee, tanbasa mak Institutu Publika la hatene hadia, halo jestaun nee uniku,” dehan Xefe Estadu.
Iha biban nee PR Horta hatete, atu tama daudaun ASEAN infrastrutura tenke aselera, tenke hadia eletrisidade, hadia telekomunikasaun, hadia estrada rural sira, Primeiru Ministru promete. Hanesan prioridade ida 2025 estrada rural, estrada nasional remata hadia no tenke halo mos estrada rural neebe sei falta. Hadia bee moos, purtantu infraestrutura boot tebe-tebes iha 2025-2027 governu tenke tau duni osan.
(eme)
