DILI, STLTIMORLESTE.com – Prezidente Republika (PR), Jose Ramos Horta lansa Kodigu Sivil Timor Leste (TL) dalen tetun iha Tribunal Rekursu.
Iha biban nee Prezidente Republika Jose Ramos Horta liu husi nia diskursu iha Tribunal Rekursu Kaikoli Kuarta nee (23/07/2025) hatete, ho laran haksolok mai lansa Kodigu Sivil TL dalen tetun iha Tribunal Rekursu.
Prezidente Republika hatete, lansa Kodigu Sivil ho anotasaun nee istoriku neebe furak no tradusaun nee verifika ona.
“Hau hein deit katak utilizador sira iha preokupasaun kona-ba konsulta orijinal ka uza tradusaun lian Indonezia seluk ba interpretasaun lo-loos, tanba hau lee ona tradusaun barak neebe la koresponde ho lejislador nia intensaun,” katak Prezidente Republika.
Aleinde nee Prezidente Tribunal Rekursu, Afonso Carmona hatete, ohin halibur hamutuk hodi halo lansamentu livru liga ho Kodigu Sivil ho lian português halo anotasaun ba lian tetun.
“Lansamentu livru ohin nee liga ho Kodigu Sivil ho lian português maibe iha nee ita halo anotasaun ho lian tetun, la signifika Kodigu Sivil ho tetun lae maibe anotasaun nunee atu bele fasilita ita nia populasaun sira neebe too oras nee seidauk komprende sira bele asesu, se mak hatene português lao normal tuir português,” dehan PTR.
Prezidente Tribunal Rekursu hatete, halo anotasaun ho lian tetun nunee atu bele fasilita komunidade neebe la hatene português no responde konstituisaun neebe hatete katak tetun mos lian ofisial.
Tanba nee halo anotasaun para fasilita ema hotu hotu autor judisiariu, estudante no publiku sira neebe presiza.
Nia hatete, Kodigu Sivil nee koalia asuntu lubuk ida entre ema ho ema, koalia kona-ba propriedade, koalia kona-ba familia no koalia mos kona-ba submesaun eransa, tanba nee mak Kodigu Sivil nee importante ba komunidade nunee karik sira nia direitu ema ruma viola karik sira mos komprende bele lori ba tribunal.
Nunee bainhira tribunal deside karik sira mos bele hatene, se lae Tribunal foti desizaun sira kestiona katak desizaun la justu no seluk tan. Tanba nee mak fasilita ho anotasaun. PTR hatete artigu hotu neebe iha Kodigu Sivil halo hotu anotasaun.
Artigu nee rihun rua resin no anotasaun signifika katak artigu sira nee halo hotu, tanba nee mak nia todan kilo ida mahar.
Partisipante neebe mak partisipa eventu lansamentu Kodigu Sivil halo anotasaun ba lian tetun nee lansa husi Prezidente Republika, no partisipa mos husi Prezidente Tribunal Rekursu, Prokurador Jeral Republika, Reprezentante Parlamentu Nasional, membru Governu, korpu dipolimatiku no Juiza sira hotu.
(eme)
