DILI, STLTIMORLESTE.com – Prezidente Republika (PR), José Ramos Horta hetan komprimentu husi Sua Majestade Liurai Simeon II, no enkontru nee simboliku klean halibur Figura Proeminente.
Prezidente Republika, Jose Ramos Horta hetan kumprimentu husi Sua Majestade Liurai Simeon II husi Bulgaria (Simeon Saxe-Coburgo-Gotha).
Tuir Komunikadu neebe STL hetan husi media Prezidensia Republika kuarta nee (23/04/2025) hatete, enkontru nee akontese iha tuku 15:30 bainhira Xefe Estadu vizita hela Igreja ikonika Boyana no Muzeu Nasional Istoria Bulgaria nian.
Enkontru nee iha importansia simboliku neebe klean, hodi halibur figura proeminente nain rua ho viajen moris nian neebe marka ho kompromisu ba sira nia povu nia dignidade no respeitu ba memoria istorika.
Liurai Simeon II halo esforsu espesial ida hodi pesoalmente halo viajen ba fatin nee iha neebe dignitariu nain rua fahe interkambiu badak.
Ambiente nee aumenta signifikadu ba enkontru, tanba Muzeu Istoria Nasional nian lokaliza iha eis-Palasiu Rezidensia Boyana nian uluk hanesan rezidensia ofisial husi líder komunista bulgaru sira inklui Todor Zhivkov.
Enkontru nee antesede vizita ida ba Igreja Boyana, Patrimoniu Mundial UNESCO nian neebe konesidu tanba nia afresku hamutuk 1259 neebe konsidera hanesan prekursor sira Renascimentu Europeu nian no reprezenta imajen ida hosi patrimoniu espirituál no kulturál Bulgaria nian.
(eme)
