DILI, STLTIMORLESTE.com – Prezidente Republika (PR), Jose Ramos Horta louva nasaun India nuudar potensia Global no demokrasia boot iha mundu.
Prezidente Republika Jose Ramos Horta hatoo louvor ba transformasaun India nian nuudar potensia global no demokrasia boot liu iha mundu husi diskursu bainhira partisipa loron Nasional India iha Hotel Timor, Sesta kalan (30/01/2026).
Prezidente Ramos hatete, nia Louva India nuudar potensia global no parseiru estratejiku iha resepsaun ba loron Republika ba da-77 no Prezidente Ramos Horta, hamutuk ho Embaixador Shri Madan Kumar Ghildiyal no korpu diplomatiku sira iha Dili selebra Loron Republika India ba da-77, hodi marka aniversariu istoriku Konstituisaun India nian.
“Fo louvor ba transformasaun India nian nuudar potensia global no demokrasia boot liu iha mundu, hodi nota katak India sei sai ekonomia terseiru boot liu iha mundu iha tinan 2027. Hodi hanoin fali ninia istoria pesoal ho India dezde tinan 1992,” dehan PR Horta.
Xefe Estadu fo omenajen ba lideransa moral Mahatma Gandhi no Jawaharlal Nehru nian, no hateten katak India nia kbiit nuudar lider ba Sul Global fo esperansa fundamental iha mundu neebe foin dadaun enfrenta “defise esperansa.”
Hodi foti kestaun kona-ba hametin relasaun bilateral neebe lalais, Prezidente Ramos-Horta selebra estabelesimentu embaixada rezidente sira iha Dili no New Delhi iha tinan 2024 nuudar pontu virajen ba servisu hamutuk iha polítika no ekonomia.
Prezidente mos hanoin fali vizita istoriku Prezidente India, Droupadi Murmu, ba Timor-Leste iha tinan kotuk no emfatiza kooperasaun neebe buras iha sektor vital sira hanesan saude, edukasaun, no Teknolojia Informasaun (TI).
Prezidente nota liuliu importansia hosi investimentu India nian iha sektor enerjia Timor Leste nian, no agradese ba Governu India ba ninia apoiu neebe kontinuu iha dezenvolvimentu rekursu umanu liuhosi bolsa estudu no formasaun medika.
Prezidente reafirma fali Timor-Leste nia apoiu neebe nakloke ba India nia aspirasaun atu hetan kadeira permanente iha Konsellu Seguransa ONU nian, hodi fo importansia ba kompromisu hamutuk ba multilateralizmu no orden internasional neebe bazeia ba regra sira.
Xefe Estadu mos enkoraja investidor Indianu sira atu esplora oportunidade iha kbiit agrikultura, lojístika, no petrokímika, hodi pozisiona Timor-Leste nuudar hub rejional neebe estavel, pasífiku no estratejiku.
“Hodi taka ho Gandhi nia liafuan matenek katak sai mudansa neebe o hakarak haree iha mundu,” dehan Prezidente Republika.
Prezidente Ramos Horta deskreve India nuudar ezemplu ba mudansa nee no inspirasaun neebe hela ba nafatin ba povu Timor.
(eme)
