DILI, STLTIMORLESTE.com – Prezidente Republika (PR), Jose Ramos Horta hasoru malu ho Enviadu Espesial Australia ba Sudeste Aziatiku, Nicholas Moore AO, hodi diskute hamutuk oinsa hametin kooperasaun iha area negosiu entre Timor Leste (TL) ho Australia.
Bainhira remata hasoru malu, Enviadu Espesial Australia ba Sudeste Aziatiku, Nicholas Moore AO ba jornalista sira iha Palasiu Prezidensial Nikolao Lobato, Bairo Pite Kinta (07/08/2025) hatete, ohin hasoru malu ho Prezidente Republika hodi fo hanoin hamutuk oinsa hametin lasu amizade iha area negosiu nia.
“Foin primeira vez hasoru malu ho Prezidente Republika Jose Ramos Horta, iha hasoru malu nee koalia kona-ba oportunidade bisnis entre Timor Leste ho Australia, Australia hakarak investe iha Timor Leste, tanba nee mak konferensia ekonomika neebe lao daudaun hela, lori mos empreza kiik husi Australia mai hasoru malu ho empreza Timor Leste atu liga ba malu koalia diak liu tan kona-ba oportunidade atu investe no servisu hamutuk iha area negosiu nia,” katak Enviadu espesial.
Nia hatete, Governu Australia iha komitmentu boot atu aumenta kapasidade Timoroan sira liu husi apoiu finanseiru mos.
Fo oportunidade ba Negosiu Australia sira atu servisu hamutuk ho Emprezarial Timor Leste nia, no durante enkontru nee mos Prezidente Republika iha sujestaun balun ba enviadu ho nia ekipa atu lori fali.
”Enkontru ida nee koalia barak kona-ba oinsa Australia ho TL servisu hamutuk, barak liu haree negosiu kiik sira no fo oportunidade ba empreza kiik sira servisu hamutuk ba oin,” katak nia.
Aleinde nee Moore vizita Timor Leste hodi partisipa iha Konferensia Ekonomika no Negosiu Timor Leste – Australia daruak (TLAUCON 2025), neebe halao iha loron 6 too 8 fulan Agostu iha Sentru Konvensaun Dili.
Konferensia neebe organiza hamutuk husi Governu Timor Leste no Australia, sublina aprofundamentu kolaborasaun ekonomika entre nasaun rua nee.
Enkontru ho Prezidente Ramos Horta reafirma ligasaun bilateral forte entre Timor Leste no Australia, partikularmente iha haburas kooperasaun ekonomika no dezenvolvimentu sustentavel.
Prezidente Republika Jose Ramos Horta hatoo kompromisu Timor Leste nian atu promove pas no estabilidade iha Sudeste Aziatiku, enkuantu rekonhese Australia nia apoiu kontinua iha viajen dezenvolvimentu nasaun nian.
“Timor Leste no Australia partilha ligasaun ida neebe forsa liu husi istoria no aspirasaun komún sira. Bainhira ita prepara atu adere ba ASEAN, parseria Australia nian sai nafatin importante tebes hodi avansa ita nia nasaun nia dezenvolvimentu no integrasaun rejional,” afirma hosi Prezidente Ramos Horta.
Timor Leste no Australia iha amizade kleur ona neebe hametin liu husi ligasaun forte entre povu ho povu. Dezde Timor Leste nia independensia iha tinan 2002, Australia sai nafatin ninia parseiru dezenvolvimentu no seguransa neebe boot liu, nasaun rua nee ativamente parseiru iha kooperasaun sira iha setor oin-oin, inklui Dezenvolvimentu, Diversifikasaun Ekonomika, programa Mobilidade Traballu Pasífiku Australia (PALM), projetu infraestrutura boot sira, Edukasaun, Seguransa no Defeza,ligasaun entre Povu, Apoiu ba Timor Leste nia membru OMK no adezaun ba ASEAN.
(eme)
