DILI, STLTIMORLESTE.com – Prezidente Republika (PR), Jose Ramos Horta hatete, durante nee observa servisu Polisia Nasional Timor Leste (PNTL) ho FALINTIL – Forsa Defeza Timor Leste (F-FDTL) lao diak.
Prezidente Republika, Jose Ramos Horta hatoo lia hirak nee ba jornalista sira, bainhira remata partisipa Seminariu Nasional ba loron Aniversariu PNTL ba dala XXV, ho tema “Hamutuk Ita Hametin Konfiansa Polisia Nasional Timor Leste”, iha Sentru formasaun PNTL, Komoro, Dili, Tersa (11/03/2025).
“Hau hatete enjeral, hau nuudar Prezidente nuudar Timoroan sempre koalia iha mundu, hau orgulhu ba ita nia forsa PNTL no F-FDTL nomos instituisaun sira seluk, ita labele haree halo kompara deit sira seluk pior liu, nee lae, maibe atuasaun operasionalidade ita nia Polisia ho F-FDTL diak tebes, hau orgulhu,” katak PR, Horta.
Iha biban nee, Prezidente Republika hatete, nia orgulhu ho atuasaun operasionalidade ba servisu PNTL no F-FDTL nia komportamentu no servisu diak tebes.
“Haree mak komportamentu no atuasaun operasionalidade ita nia Polisia no F-FDTL diak tebes, hau orgulhu nuudar Prezidente, hau halo avalisaun observasaun hau bele hatete loron ida nee parabens ba PNTL dezde 1999 too ohin haksuit boot ba oin,” katak nia.
Xefe Estadu hatutan, iha problema balu maibe liu-liu organizasional nee atual Governu haree no Komando Jeral haree oinsa mak bele hadia kondisaun no promosaun.
“Resposta badak mak nee, parabens ba ita nia polisia, obrigadu ba sira nia servisu neebe diak fo ba ita posiblidade para toba hakmatek ba populasaun iha bairu bairu sira nee,” dehan PR Horta.
Nunee mos Ministru Prezidensial Konselhu Ministru, Agio Pereira hatutan, tema ba aniversariu PNTL hamutuk ita hametin konfiansa Polisia Nasional Timor Leste, nee konfiansa populasaun ba PNTL nee krusial tebes, para PNTL bele lejitimidade atu uza forsa servi nasaun bem komum.
“Sem konfiansa populasaun nia, PNTL bele lejimitidade uza forsa, nee mak hau realsa katak elementu ida hodi halo refleksaun, atu koalia mos bainhira tinan 25 ba kotuk PNTL iha situasaun neebe komplikadu tebes tanba iha tranzisaun ita tenke kria situasaun ida katak atu servi populasaun,” katak Agio.
Nunee mos Ministru Interior, Francisco da Costa Guterres hatutan, PNTL selebra 25 anos baibain bolu karik ano de prata, tinan osan mutin nia.
“Kestaun importante mak nee, ohin Prezidente Republika mai nee hatoo kestaun importante ida ba hotu-hotu katak, povu nia konfiansa nee mak fator determinante atu PNTL halao nia servisu, tanba nee sua exelensia Prezidente koalia liga liu ba kestaun oinsa mak PNTL prepara nia aan para halao nia servisu ho diak para tane nia konfiansa neebe povu tula hela ba kabaas,” katak nia.
(eme)
