DILI, STLTIMORLESTE.com – Prezidente Republika (PR), Jose Ramos Horta oferese Banquete Ofisial hodi fo ondra ba Samdech Akka Moha Sena Padei Techo HUN SEN.
Iha Kinta kalan (08/05/2025) Prezidente Republika Jose Ramos Horta oferese Banquete Ofisial hodi fo ondra ba Samdech Akka Moha Sena Padei Techo HUN SEN, iha Palasiu Nobre Lahane.
Prezidente Ramos Horta iha ninia diskursu boas-vindas ho onra boot simu Prezidente Senadu Reinu Kamboja nian no Eis Primeiru Ministru, Samdech Akka Moha Sena Padei Techo Hun Sen, belun ida valiozu no antigu ba Timor Leste.
Prezidente destaka prezensa Samdech Techo HUN SEN nuudar testemunha forte ba amizade duradouru entre Timor Leste no Kamboja.
“Iha nasaun sira Sudeste Aziátiku nian, Timor Leste no Kamboja ligadu ho ameasa rezilensia partilhada no aspirasaun koletivu. Ita nia amizade laos deit diplomatiku, ida nee harii iha ita nia viajen paralelu sira ba pas no soberania. Bainhira ita hamriik hamutuk ohin, ita hatudu katak nasaun sira neebe komprende diak liu terus bele harii baze forte liu ba pas no armonia rejional neebe metin. Nee mak matenek neebe ita nia povu rua oferese ba ita nia rejiaun no mundu, Hein katak bankete ida nee sai laos deit sai hanesan omenajen ba ita nia pasadu partiladu maibe mos hanesan inísiu ba kapítulu foun idaida neebe nakonu ho kolaborasaun neebe klean liu, respeitu ba malu no susesu hamutuk,” hatete Prezidente Ramos Horta.
PR Horta dehan, vizita alto nivel ida nee sublinha ligasaun diplomatika neebe dezenvolve entre nasaun rua Sudeste Aziatiku nian, neebe partilha esperiensia istorika hanesan iha sira nia jornada ba pas no soberania.
Prezidente Ramos Horta hatoo apresiasaun ba Samdech Techo HUN neebe fo ona onra ba Timor Leste ho nia vizita signifikativu ida nee no hein atu kontinua nafatin amizade no kooperasaun entre nasaun rua nee.
(eme)
