DILI, STLTIMORLESTE.com – Prezidente Republika (PR), Jose Ramos Horta ofisial simu karta kredensia husi Embaixador Foun Uniaun Europeia nian mai Timor Leste.
Prezidente Republika Jose Ramos Horta.ofisialmente simu karta Kredensial husi Thorsten Bargfrede, Embaixador Foun Uniaun Europeia nian mai Republika Demokratika Timor Leste, serimonia nee halao iha Palasiu Prezidensial Nicolau Lobato, Segunda (15/09/2025).
Relasaun diplomatika entre Timor Leste ho Uniaun Europeia, neebe harii iha loron 20 Maiu 2002, iha abut klean iha parseria ida neebe kleur ona bazeia ba valor sira neebe fahe ba malu kona-ba demokrasia, direitus umanus, no estadu direitu.
UE nuudar parseiru dezenvolvimentu dahuluk neebe fo apoiu ba Timor Leste, defende prinsípiu Nasaun Rasik mak nain, Nasaun rasik mak Lidera, no uza sistema nasaun nian rasik. Kooperasaun atual foka ba diversifikasaun no kresimentu ekonomiku, boa governasaun, dezenvolvimentu verde no sustentavel, inkluzaun sosial, no integrasaun rejional, notavelmente liuhusi apoiu ba Timor Leste nia adezaun ba ASEAN no Organizasaun Mundial Komersiu.
Embaixador foun, Thorsten Bargfrede, nuudar diplomata ida neebe iha esperiensia ho kareira distintu iha Servisu Asaun Esterna Europeu nian. Nia lori esperiensia barak husi kargu xave sira iha Sri Lanka, Maldivas, Kenya, Pakistaun no Bruxelas, ho foku ba asuntu polítiku sira, planeamentu estratejiku, no kooperasaun dezenvolvimentu.
Prezidente Ramos Horta espresa ninia konfiansa katak, Embaixador nia esperiensia diplomatika neebe extensivu sei kontribui signifikativamente ba aprofundamentu ligasaun bilateral sira.
“Uniaun Europeia sai hanesan parseiru ida neebe metin dezde momentu sira uluk liu iha ita-nia nasaun nia renasimentu. Ita-nia parseria, neebe baseia ba rezpeitu mutuu no valor sira neebe fahe ba malu, kontinua fo kbiit ba ita-nia instituisaun no ita-nia povu. Apoiu husi UE nian fundamental tebes ba ita luta ba reziliensia ekonomika, integrasaun rejional, no futuru sustentavel ba Timor oan sira hotu. Ita hein atu servisu hamutuk ho Embaixador Bargfrede hodi hametin liutan aliansa importante ida nee,” dehan PR Horta.
Prezidente Ramos Horta rekonhese projetu oin-oin neebe halao hela neebe hetan apoiu husi Ekipa Europa no dezeja ba Embaixador Bargfrede mandatu ida neebe susesu no produtivu iha Timor Leste.
Jornalista: Emerenciana Pinto
Editor: Xisto Mendonça
