DILI, STLTIMORLESTE.com – Prezidente Republika (PR), Jose Ramos Horta orienta ekipa husi Prezidensial Republika tulun familia defisiensia iha Ainaro, hafoin haree informasaun viral iha media sosial.
Prezidente Republika tulun ona familia defisiensia iha Ainaro, hafoin haree informasaun neebe viral iha media sosial iha loron hirak liu ba.
Xefe Estadu orienta Unidade Servisu Sosiedade Sivíl no Assuntu Sosiál (SSSAS), Prezidensia Republika atu desloka ba Suku Mulo, Postu Administrativu Hato-Builico, Munisípiu Ainaro ba haree direta no fo asistensia lalais ba aman ho oan ida neebe iha kondisaun defisiensia fiziku-mental.
Armando Amaral de Deus tinan 49 no nia oan feto Joselina de Deus tinan 23 moris ho limitasaun grave rezulta husi ahi-han neebe aprova kanek boot iha kotuk laran. Maski kondisaun nee grave loos maibe família too agora seidauk simu apoiu sosial ruma.
Kazu ida nee Primeiru-vez fo hatene husi Profisional Saude Zélia da Silva de Jesus, husi Postu Saúde Mau-Chiga, neebe hasoru aman no oan feto iha dalan ho kondisaun neebe difísil.
“Iha oras 17:48, rai komesa nakukun, bainhira hau fila husi servisu fatin, iha dalan hau hasoru avo ho alin feto ida, neebe avo dada hela nia oan nia liman. Kondisaun alin feto nee hau haree hanesan la seguru no hau mos sente aroma la-diak husi sira. Hau para motor no husu informasaun, hau nia laran sente triste tebes haree kondisaun nee”, hateten Zelia da Silva liu husi komunikadu neebe STL asesu Segunda (08/09/2025).
Nia hatutan, haree ba situasaun nee nia foti inisiativa hodi tula avo ho nia oan nee ba nia uma hodi halo tratamentu mediku.
Família nee husu ona asistensia sosial ba Ministeriu Solidariedade Sosial no Inkluzaun (MSSI) no autoridade lokal maibe seidauk hetan responde ka asaun ruma.
Tuir orientasaun husi Prezidente Ramos-Horta, ekipa Prezidensia Republika liu husi Unidade Servisu Sosiedade Sivil no Asuntu Sosial (SSSAS) hamutuk ho doutor espesialista nain rua husi Kuba, halo vizita direta kedas ba familia nee iha Ainaro.
Ekipa mediku fo konsulta inisial no deside desloka ona família nee ba Hospital Nasional Guido Valadares (HNGV), Dili, hodi hetan tratamentu mediku apropriadu.
Jornalista: Emerenciana Pinto
Editora: Domingas Gomes
