DILI, STLTIMORLESTE.com – Prezidente Republika (PR), Jose Ramos Horta fo orientasaun ba Embaixador Timor Leste ba Vietname, João Pereira, atu hametin relasaun no kooperasaun ho Vietname iha area ekonomia.
Kestaun nee hatoo husi Embaixador Timor Leste ba Vietname, João Pereira ba jornalista sira bainhira remata halo enkontru ho Prezidente Republika Jose Ramos Horta iha Palasiu Prezidensial Nikolao Lobato, Bairo Pite, Tersa (29/07/2025).
Embaixador hatete, durante enkontru Prezidente Republika Jose Ramos Horta orienta embaixador atu hametin relasaun ho nasaun Vietname iha area ekonomia.
Nia hatete, Prezidente Republika, Jose Ramos Horta fo orientasaun atu kontinua mantein relasaun bilateral entre país rua nee, tanba Vietname ho Timor Leste nee iha istoria, sofrimentu hanesan, hakarak hametin liu tan relasaun país rua nee ba oin.
Xefe Estadu hatete, la kleur tan Timor.Leste sai ona membru ASEAN, Vietname mos membru ASEAN oinsa koopera ho membru ASEAN sira seluk, orientasaun ida mak nee.
“Maibe, orientasaun seluk mak Prezidente Republika hakarak kontinua estabelese relasaun diak iha area ekonomia, tanba Vietname agora surjia makaas nia ekonomia, Vietname nia ekonomia melhor iha ASEAN agora, ninia GDP sae makaas loos ekonomia nee país ida mak Vietname iha ASEAN nee mak Prezidente Republika hakarak hametin relasaun ho Vietname iha area ekonomia, liu-liu area agrikultura, peska sira nee Vietname nee melhor iha mundu,” dehan Embaixador.
Embaixador dehan, presiza hametin relasaun tanba vietname ekonomia makaas liu-liu mos iha area agrikultura, peskas, Vietname melhor iha mundu, tanba Vietname mak exportador, hanesan ema hatene Vietname top one iha mundu, depois aifuan nee mos Vietname top one iha mundu, neebe setor hirak nee Prezidente Republika orienta atu kontinua, kria negosiasaun ho sira bele iha relasaun fila ho Vietname.
(eme)
