DILI, STLTIMORLESTE.com – Prezidente Republika (PR), José Ramos Horta hatete, Sua Santidade Papa Francisco nia esforsu uniku harii ponte sivilizasaun reliziaun fiar no kultura oin-oin.
Prezidente Republika, Jose Ramos Horta foin lalais nee partisipa iha webinar Online Global Town Hall, neebe foka liu ba knaar no legadu Papa Francisco nian iha asuntu mundial sira.
Durante nia intervensaun, Prezidente fahe nia impresaun pesoal sira husi nia enkontru sira ho Papa, espresa admirasaun neebe klean ba Amu Papa nia matenek no esperiensia estraordinaria neebe Papa aborda iha situasaun sira neebe kompleksu no delikadu.
Husi komunikadu neebe STL asesu Tersa nee (20/05/2025), Prezidente destaka Papa Francisco nia esforsu uniku sira atu harii ponte entre sivilizasaun, relijiaun, fiar no kultura oin-oin hodi fo ezemplu sira hanesan nia enkontru istoriku ho líder Igreja Kristaun Ortodoksa nian no nia partisipasaun iha dialogu interrelijiozu signifikativu sira iha Emiradus Árabes Unidus.
Pontu xave ida neebe PR Ramos Horta sublina mak importasia istorika husi deklarasaun kona-ba Fraternidade Umanu.
Prezidente fahe oinsa dokumentu ida nee elabora ho kuidadu iha kotuk molok atu asina husi Papa Francisco no Grande Imam Al-Azhar nian iha 2019.
PR Ramos Horta nota ho orgulhu katak Timor Leste nuudar nasaun dahuluk iha mundu neebe adota deklarasaun ida nee nuudar dokumentu nasional, hodi integra iha kurríkulu eskolar, pasu neebe simu ho laran ksolok tantu husi Amu Papa no Grande Imam.
Prezidente mos adota perkursu sira husi vida Papa Francisco nia neebe kontribui ba ninia estatura uniku iha istoria Papa nian, inklui ninia esperiensia sira no tradisaun intelektual jezuíta sira nian.
(eme)
