DILI, STLTIMORLESTE.com – Relasiona ho Seminariu Nasional ho tema “Papel Jerasaun foun iha Kontestu Dezenvolvimentu Nasional hodi Hatudu obra Jerasaun Tuan”, iha Prezidente Republika (PR) Jose Ramos Horta nia intervensaun husu atu foin sae sira tenke estuda.
“Hau nia intervensaun hanesan deit introdusaun, maibe hau hatete ita koalia beibeik kona-ba papel juventude, hau hatete papel juventude liu-liu mak estuda, estuda, estuda. Inan aman, tiu sira kuitadu, sakrifisiu todan kosar metan, orgulhu tau oan sira iha eskola,” dehan Prezidente iha Palasiu Prezidente Aitarak Laran, Tersa nee (02/09/2025).
PR dehan, primeiru, joven sira iha obrigasaun haree imi nia inan-aman sira nia kosar been, bainhira oan ida, se familia simples, kiak, iha aldeia oan ida hetan lisensiatura, inan-aman sira orgulhu loos, aldeia tomak mos orgulhu, tenke hanoin ida nee.
Responsabilidade numeru dahuluk mak ida nee, estuda, maibe estuda didiak duni, laos hetan deit diploma, depois bainhira halo teste ruma la hatene.
PR hatete, estuda duni nunee sai top, labele deit hetan diploma, tenke konhesimentu boot liu no estuda, inan-aman sira lakon osan, tulun imi, tane tinan hira nia laran, ikus mai hetan diploma.
“Aproveita estuda, tanba tinan ida lakon tinan nee la fila, tinan lima lakon, tinan lima la fila ba oin. Kondisaun, buat neebe importante ba Timor Leste mak dame, dame, ho dame mak imi bele estuda, ho dame mak bele iha dezenvolvimentu rai nee nian, ho dame mak investor husi liur hakarak mai, tanba sira laiha estabilidade, laiha dame sira tauk,” tenik PR.
Iha fatin hanesan, Primeiru Ministru (PR), Xanana Gusmão mos hatoo nia intervensaun katak, jerasaun foun barak mos partisipa ona iha dezenvolvimentu.
“Dala ruma ita temi liafuan jerasaun foun, atu dehan katak liafuan sira nee mosu sai husi ita nia ibun, maibe ita mos la komprende didiak saida, husi kedan funu nian mai too agora, ita hetan tiha restaurasaun ukun aan nian, haree ba formasaun Governu, formasaun Parlamentu, ita labele dehan katak mesak katuas deit, hanesan atan oan hau, mas husi jerasaun foun barak mos partisipa ona iha dezenvolvimentus ida nee,” dehan PM.
Jornalista: Terezinha De Deus
Editor: Xisto Mendonça
