DILI, STLTIMORLESTE.com – Prezidente Republika (PR), Jose Ramos Horta no Primeiru Ministru (PM) Japaun, Ishiba Shigeru halao enkontru, oinsa hametin kooperasaun bilateral entre Timor Leste ho Japaun iha futuru.
Prezidente Republika, Jose Ramos Horta no Primeiru Ministru Japaun, Ishiba Shigeru halo enkontru konsolida parseria estratejika entre Timor Leste no Japaun durante almosu servisu ofisial ida neebe importante tebes iha Tokio, iha loron kuarta, 26 fulan Agostu 2025.
Lider nain rua halao diskusaun substantiva ho objetivu atu hametin kooperasaun bilateral iha setor xave sira, inkluindu dezenvolvimentu ekonomiku, enerjia renovavel no investimentu, no iha tempu hanesan, aborda mos kestaun krítika sira kona-ba pas no seguransa rejional.
Enkontru nee haree fila-fali ba kooperasaun forte durante dekada rua resin, hodi destaka ba apoiu esensial husi Japaun neebe too ona total liu millaun $438. Apoiu ida-nee importante tebes ba projetu infraestrutura boot sira hanesan terminal pasajeiru foun Aeroportu Internasional Dili nian, modernizasaun Hospital Nasional Guido Valadares, no haforsa Radio e Televisão de Timor Leste, Empresa Publica (RTTL, EP).
Diskusaun nee kobre mos investimentu privadu signifikativu husi kompania Japaun nian hanesan Tsuneishi Shipping no INPEX, hodi sublina evolusaun ba parseria ida neebe luan hodi promove kreximentu sustentavel.
Iha domíniu ba defeza no seguransa, enkontru nee reafirma kompromisu Japaun nian atu haforsa kapasidade seguransa Timor-Leste nian liu husi ninia kuadru Asistensia Seguransa Ofisial (OSA), kompromisu ida neebe foin daudaun nee hatudu liuhusi vizita ro naval Japaun nian, OHSUMI, ba portu Dili.
Lider nain rua remata ho kompromisu mutua atu aselera dezenvolvimentu komun no haforsa papel Timor Leste nian nuudar parseiru konfiavel no estavel ba Japaun iha Sudeste Aziatiku, hodi konsolida vizaun komun ida ba rejiaun ida neebe prosperu no dame.
(eme)
