DILI, STLTIMORLESTE.com – Prezidente Republika (PR), Jose Ramos Horta hasoru malu ho Primeiru Ministru Malazia Anwar Ibrahim diskute kona-ba preparasaun Timor Leste nia adezaun ba iha ASEAN iha fulan Outubru tinan nee.
Prezidente Republika Jose Ramos Horta ba jornalista sira bainhira remata vizita privadu ba iha nasaun Malazia no vizita trabalhu ba Monako fila hikas mai iha Timor Leste iha Aeroportu Internasional Nikolao Lobato, Komoro, Kinta lokraik (26/06/2025).
PR hatete, ba nasaun rua ida mak ba Malazia, Malazia nee ba hanesan privadu, konvite husi taylor University, nomos vizita trabalhu ba Monako.
Iha Malazia, Prezidente Republika hasoru malu ho Primeiru Ministru Malazia hodi diskute hamutuk kona-ba preparasaun Timor Leste nia adezaun ba ASEAN iha fulan Outubru tinan 2025.
“Iha neeba mos hasoru Primeiru Ministru Malazia ho ema lubuk ida, no hasoru malu Primeiru Ministru koalia kona-ba prosesu adezaun preparasaun serimonia iha Outubru, Governu ho Sekretariu Jeral ho Prezidensia Malazia nia mak atu haree, dala ida tan hau konvida Primeiru Ministru Anwar atu mai nia hatete sim sei mai haree lai antes Outubru ou liu tiha serimonia adezaun, maibe ida nee seidauk iha konfirmasaun antes ou depois,” dehan PR Horta.
Prezidente Republika aleinde koalia kona-ba prosesu Timor Leste nia adezaun ba ASEAN, iha biban nee Prezidente Republika mos konvida Primeiru Ministru Malazia atu vizita Timor Leste, no PM Malazia hatan ona maibe data fiksu mak seidauk klaru.
Aleinde nee Prezidente Republika mos halo vizita trabalhu ba iha Monako hodi hasoru malu mos ho liurai boot Principe albert II.
“Liurai boot Principe mak konvida hau ba vizita ofisial, liurai boot Monako uluk mai Timor Leste iha hau nia primeiru mandatu nia mai iha 17 Abril 2008, depois liu too Same ba inaugura klinika ida iha neeba maternu infantil ke funsiona ho diak lao maibe agora hanesan kiik fali ona oituan tanba uluk ema la barak maibe agora pasiente barak los iha neeba,” katak PR Horta.
Aleinde nee liurai Monako mos hakarak vizita Timor Leste maibe seidauk iha data fiksu, tanba nee sei haree took bainhira mak Principe Albert bele mai TL, aleinde nee iha Monako halo konferensia rua ka tolu iha neeba.
“Ema investidor barak iha neeba, sira mos ba partisipa iha konferensia seluk iha sebila no Visi Primeiru Ministru Kalbuady mak sei ba reprezenta, hau mos simu konvite mais la ba, atu ba konferensia sebila,” katak PR Horta.
Aleinde nee Prezidente Republika nia viajen ba iha nasaun rua Malazia no Monako hodi hametin lasu amizade no hametin koperasaun bilateral.
(eme)
