DILI, STLTIMORLESTE.com – Prezidente Republika (PR), Jose Ramos Horta hatete, nia sempre promove kafe Timor Leste (TL) ba mundu, no primeiru lori kafe Timor fo ba matebian Sua Santidade Papa Francisco iha Roma.
Prezidente Republika Jose Ramos hatoo kestaun nee ba jornalista sira liu husi Konferensia Imprensa iha Palasiu Prezidensial Nikolao Lobato, Bairo Pite, Tersa nee (27/05/2025).
“Hau koalia ho Amu Papa laos nia mai koalia, hau ba Roma iha Outubru 2021 primeira vez hau hasoru malu ho Amu Papa tanba hau sai membru Juri Internasional ida juri neebe deside kona-ba Premiu Internasional Fraternidade Humana, nee tinan tinan ami tenke ba roma hasoru Papa koalia kona-ba premiu nee, momentu neeba mesak mesak ho nia koalia tiha ona kona-ba nia vizita buat sira nee segredu,” katak PR Horta.
Prezidente Republika hatete, bainhira vizita ba Roma Prezidente lori kafe saku ida hodi entrega ba Sua Santidade Papa Francisco iha Vatikanu Roma.
“Primeiru vez lori kafe ba Amu Papa, baibain nee o labele tama ba hasoru Amu Papa o ba lalin fali kafe tama ba palasiu, hau entrega saku boot ida ba protokulu vatikanu nia depois hau kontente hakfodak oituan kuandu hau tuur iha kadeira protokulu vatikanu nia lori saku tau sorin tanba sira komprende entau enkontru liu tiha hau hatete ba Amu Papa ita boot ema Argentina hau fiar ita hemu kafe loron-loron, nia hatan sim hau hemu kafe loron-loron, hau dehan favor hemu deit kafe Timor nia labele hemu kafe seluk,” dehan PR Horta.
Prezidente Republika hatete, bainhira hasoru Sua Santidade Papa Francisco, Prezidente entrega kafe Timor Leste ba padre no husu padre hemu deit kafe Timor sabor labele hemu kafe husi nasaun seluk.
“Hau hatete labele hemu kafe Brazil nia, Kolombia nia, ami nia diak liu, pois nia rasik husu kafe gostarika, tanba kafe gostarika famozu, hau hatete labele hemu kafe gostarika hemu mak ami nia, depois hau hatete ba nia, amu iha Timor povu hatene karik Amu Papa hemu deit kafe Timor nia sira hotu-hotu kontente, hau husu ba nia amu hau bele hatete sai iha Timor Amu Papa hemu deit kafe Timor nia hatan sim bele, entaun hau hatete ba nia ita boot hatene nee bosok boot ida, maibe bosok nee diak nia,” katak Horta.
Prezidente dehan, nee hola parte ninia obrigasaun buka oinsa atu marketing kafe Timor nia, no buat sira nee lori tinan naruk hodi halo laos tuur tuur halo ohin, maibe tenke koresponde ba realidade ida neebe iha rai laran iha dame laiha konflitu laiha problema etnia relijaun buat sira nee hotu.
(eme)
