DILI, STLTIMORLESTE.com – Prezidente Republika (PR), Jose Ramos Horta promulga ona proposta Orsamentu Jeral Estadu (OJE) 2025 neebe mak hatoo husi Parlamentu Nasional, Segunda nee.
Prezidente Republika Jose Ramos Horta hatoo lia hirak nee ba jornalista sira bainhira remata halo vizita ba Konventu Madre Alma Bebonuk, Segunda (25/11/2024).
Horta hatete, iha Segunda dader promulga ona OJE 2025 neebe mak hatoo husi Prezidente Parlamentu Nasional.
“Ohin dader hau simu Prezidente PN, para entrega OJE ba hau, no hau promulga tiha ona, tanba fulan hira nia laran hau simu tiha ona kopia ida, no estuda kleur tiha ona laiha problema konstitusional. FRETILIN ho PLP vota kontra, maibe hau fiar laos kestaun konstitusional, tanba fulan hira nia laran maizumenus hau simu tiha ona estuda kleur ona, neebe ohin hau promulga tiha ona,” katak Horta.
Prezidente Republika hatete, nia ladun konkorda Governu seidauk halo reforma makaas ba Instituisaun Publiku, tanba PM preokupa makaas mos tanba instituisaun publiku barak demais.
PR Horta hatete, iha rai seluk hanesan Portugal, Instituisaun Publika eletrisidade jestaun diak tebes hatama osan boot ba estadu, tanba nee mosu hanesan instituisaun publiku para iha jestaun rasik hanesan privadu hanesan hatama osan boot, maibe eletrisidade Timor Leste hatama osan hira ba estadu, no eletrisidade mate lakan la para inklui Hospital sira mos preokupa, tanba impaktu husi eletrisidade mate lakan halo ekipamentu neebe hola karun estragu hotu.
Iha biban nee, Prezidente Republika mos hatoo parabens ba Prezidente Parlamentu Nasional, tanba premeiru vez OJE liu ho antes Dezembru, segundu parabens mos ba Governu maioria total so partidu rua deit mak vota kontra.
(eme)
