DILI, STLTIMORLESTE.com – Prezidente Republika (PR), Jose Ramos Horta rekomenda Governu diak liu halo selebrasaun ba tinan 30 ezistensia Comunidade dos Países de Língua Portuguesa (CPLP) halao iha Lisboa, Portugal.
Prezidente Republika Jose Ramos Horta hatoo lia hirak nee ba jornalista sira iha Palasiu Prezidensial Nicolau Lobato, Bairo Pite, Kinta (05/03/2026) hatete, nia rekomenda ba Governu diak liu selebrasaun tinan 30 ezistensia CPLP nee halao iha Portugal, maibe desizaun hotu mai husi Governu.
“Governu mak sei deside atu halo iha neebe, hau nia rekomendasaun diak liu halo iha Lisboa, Portugal? Tanba Primeiru ano fundasaun hahu CPLP nee iha Lisboa, 30 anos diak liu iha neeba, nee mos fasil liu ba sira rai seluk ba ita mak dook liu oituan ba mais sira seluk besik, estrutura oin-oin prepara iha neeba nee kmaan ba Govenu para halo simeira selebrasaun 30 anos,” dehan PR Horta.
Prezidente Republika hatete, bainhira hatoo rekomendasaun nee ba Primeiru Ministru kontente ho ideia nee diak liu, maibe desizaun neebe Governu halo definitivu PR konkorda.
“Desizaun neebe Governu halo definitivu hau konkorda, nee kompetensia Governu nia, hau fo ideia nee para hanesan kmaan ba Governu no kmaan ba hotu hotu,” katak Horta.
Aleinde nee Prezidente Republika mos sei halo viajen ba Portugal hodi partisipa tomada de pose ba Prezidente Portugal, oinsa Prezidente nia esperansa? Hatan ba kestaun nee, Prezidente Republika hatete, nee simbolika tebes tanba Timor Leste sempre partisipa iha inagurasaun Prezidente Portugal no sira mos sempre mai Timor.
“Atu trata bilhete ba komplikadu los, tanba labele liu husi Dubai, Abu Dhabi, Doha, entaun ema lubuk ida juta ba juta husi ASEAN nee hotu-hotu liu husi Singapura, Malazia, Hongkon buka direita ida nee susar tebes hetan, finalmente horiseik hetan posibilidade Dili-Bali Bali-Hongkon, Hongkon-Surich Surich-Lisboa, loron ida ho balun deit iha neeba, serimonia nee dia 9 dader remata ho almosu dia 10 hau aranka ba Azerbazaun ba kompromisu ida iha neeba, depois dia 15 iha nee fali ona,” katak PR Horta.
Tanba dia 15 eventu boot iha Timor, Prezidensia no Governu mak husu ho embaixador hamutuk hanoin 40 ka 50 sira iha nee rezidensia sira mai husi Indonezia akreditadu iha Timor hanesan resepsaun annual halo ba korpu diplimatiku, ida nee tradisaun iha rai barak iha mundu.
“Hau husu ba Primeiru Ministru se iha nee, Primeiru Ministru mak halo diskursu klean enome da nasaun, baibain nee Prezidente mak halo maibe hau halo deit welcome depois Primeiru Ministru aproveita oportunidade halo diskursu klean ba korpu diplomatiku tomak maibe depende ba nia ajenda dia 15 ka 16,” katak nia.
Oinsa PR Horta nia esperansa ba PR Portugal? hatan ba kestaun nee Prezidente Republika hatete, nia konhese diak PR Portugal dezde sei joven, ema diak simples, no papel PR Portugal nia hanesan mos Timor laos papel ezekutivu.
(eme)
