DILI, STLTIMORLESTE.com – Prezidente Republika (PR), Jose Ramos Horta reprezenta povu Timor Leste (TL) partisipa iha prosesu Funebre Sua Santidade Papa Francisco, iha Roma.
Prezidente Republika, Jose Ramos Horta marka prezensa iha funeral Sua Santidade Papa Francisco nian iha Sidade Vatikanu, hodi reprezenta Timor Leste no ninia povu tomak iha serimonia solene ida nee. Prezidente akompanha husi Ministru Negosiu Estranjeiru no Kooperasaun, Bendito dos Santos Freitas no delegasaun sira.
Prezidente Ramos Horta hamutuk ho lider mundial sira no sarani rihun ba rihun hodi fo omenajen ikus ba Sua Santidade Papa Francisco, neebe hakotu iis iha loron 18 fulan Abril tinan 2025, ho idade 88.
Sua Santidade Moris ho naran Jorge Mario Bergoglio iha loron 17 fulan Dezembru tinan 1936, iha Buenos Aires, Argentina, Francisco sai nuudar Papa ba dala 266 iha Igreja Katolika iha loron 13 Marsu 2013, hafoin rezignasaun Papa Bento XVI. Nuudar Papa Jesuita dahuluk, dahuluk husi Amerika, no dahuluk husi Hemisfériu Sul, Papa Francisco lori perspetiva foun ba ninia papadu durante ninia pontifikadu ba tinan sanulu-resin-rua marka ho haraik-an, korajen, no sasin naroman ba fiar, justisa, no domin ba umanidade.
Sua Santidade Papa Francisco iha signifikadu espesial ba povu Timor Leste, nasaun ho persentajen Katoliku segundu boot liu iha mundu depois de Vatikanu. Durante ninia papadu, Papa Francisco sublina beibeik importansia atu dignifika ema kiak no marjinalizadu sira, mensajen ida neebe iha rezonansia forte ho povu Timor Leste neebe aguenta durante dekada barak luta ba independensia. Amu Papa Francisco ultrapasa liu fronteira relijiozu sira no inspira ema sira husi fiar hotu-hotu.
Iha karta ida neebe diriji ba Kardeal Giovanni Battista Re, Dekanu Kolejiu Kardeal sira nian, iha loron 21 fulan Abril tinan 2025, Prezidente Ramos Horta hatete:
“Hodi Povu Timor Leste nia naran, hau hatoo sentidu kondolensia profunda ba Igreja Katolika no ba sarani sira hotu iha mundu tomak durante tempu triste no orasaun ida nee. Memoria Papa Francisco sei moris nafatin iha povu Timor nia fuan, partikularmente hafoin nia vizita Apostolika mai Timor Leste iha Setembru 2024, neebe nunka atu bele haluha, iha momentu neebe nia kona tebes ita nia Nasaun nia espíritu ho liafuan kona-ba esperansa, inkluzaun no fraternidade. Ninia prezensa iha ita nia leet nuudar sinal ligasaun espiritual neebe halibur povu Timor Leste ho Santu Padre no Igreja Roma nian, no sei hanoin ba nafatin nuudar bensaun ida.” dehan PR husi Komunikadu Sabadu (26/04/2025).
Iha loron 23 fulan Abril, kasaun Papa Francisco nian lori husi kapela Casa Santa Marta ba Bazílika São Pedro, iha neebe sarani sira nain sira hatoo respeitu durante loron tolu nia laran.
Prezidente Ramos-Horta no delegasaun Timor Leste partisipa iha Misa funeral ba Sua Santidade Papa Francisco, neebe halao iha loron-sabadu, 26 fulan-abríl tinan 2025, tuku 10:00 dadeer oras Roma nian iha Prasa São Pedro, neebe prezide husi Kardeal Giovanni Battista Re, Dekanu Kolejiu Kardeal sira nian.
Hafoin misa, iha prosisaun akompanha Amu Papa nia kaixaun husi Prasa São Pedro ba Bazílika Santa Maria Maiór (Bazílika di Santa Maria Maggiore), fatin ba nia deskansa.
Iha nia moris tomak no ministeriu nuudar padre no bispu, Amu-Papa Francisco sempre entrega nia aan ba Inan Liurai Feto, Santíssima virgem Maria. Iha ninia testamentu ho data 29 Junhu 2022, Sua Santidade espesifika nia hakarak sira “Hau hakarak hau nia última viajen iha rai termina lo-loos iha antiga santuariu Maria ida nee, neebe hau sempre mai hodi halo orasaun iha inísiu no ikus husi kada Viajen Apostolika sira, ho konfiansa entrega hau nia intensaun sira ba Inan Imakulada, no agradese ba nia kuidadu domin no maternal.”
Iha ninia testamentu, Papa Francisco husu atu prepara nia rate iha fatin hakoi nian entre Kapela Paulina no Kapela Sforza Bazílika nian, husu rate simples ida ho deit inskrisaun Franciscus.
Sua Santidade remata ho liafuan “Hau hein katak Nai haraik rekompensa adekuada ba sira hotu neebe hadomi hau no kontinua halo orasaun ba hau. Sofrimentu neebe marka ona parte ikus husi hau nia moris, hau oferese ba Nai, ba dame iha mundu no ba fraternidade entre povu sira.”
Timor Leste hamriik iha komunhão espiritual ho Sé Apostolika no milhaun katoliku sira iha mundu tomak neebe halerik ba Santu Padre nia saída. Nasaun deklara ona períodu lutu nasional durante semana ida ho bandeira sae meia hasta, dezde loron 22 fulan Abril tinan 2025, hodi fo omenajen ba Sua Santidade Papa Francisco.
(eme)
