DILI, STLTIMORLESTE.com – Prezidente Republika (PR), Jose Ramos Horta sai uma nain ba konsertu pianu no orkestra hodi promove talentu muzikal foinsae sira nian.
Iha loron kinta lokraik (08/01/2026) Prezidente Republika Jose Ramos Horta sai uma nain ba konsertu pianu no orkestra neebe furak iha Palasiu Prezidensial Nicolau Lobato. Eventu nee selebra nasaun nia talentu muzikal foinsae sira nian neebe estraordinariu no destaka futuru promisor husi paizajen kultural Timor Leste nian.
Konsertu nee konta ho atuasaun notavel husi joven pianista Solomon Bravery Hasudungan Horta no Teshan Singh Sidhu, hamutuk ho Orkestra Juvenil Dom Bosco Baucau no Orkestra Berliku Fanu Rai (BFR).
Solomon Bravery Hasudungan Horta moris iha 10 Agostu 2014 mak artista ida multitalentoza neebe buras daudaun, husi axendensia Timorense no Indonezia nian. Pianista ida neebe ho talentu, nia manan ona premiu oioin iha primeiru-lugar no Pianista neebe Promisor Liu iha festival sira iha Irlanda Norte. Ninia talentu sira habelar ba oatoria no drama, iha neebe nia hetan onra importante sira, no ba projesaun, ho partisipasaun iha filme sira BBC Teach nian no papel prinsipal iha filme badak Natal Disney+ nian The Boy and the Octopus, neebe diriji husi Taika Waititi.
Solomon nuudar oan-mane husi Helio Dos Reis Horta, fotografu timor-oan no subrinu husi Prezidente Jose Ramos-Horta, neebe estuda fotografia iha Portugal molok muda ba Reinu Unidu, ho nia kaben, Maria Siahaan, husi Indonezia. Família nee agora hela no serbisu iha Irlanda Norte, Reinu Unidu. Solomon Horta nia formasaun multikultural neebe riku fo influensia klean ba ninia espresaun kriativa. Aleinde arte sira, nia mos desportista ativu ida iha tenis no natasaun. Nia dezenvolve daudaun nia-an sai nuudar joven artista ida neebe dedikadu no matenek.
Teshan Singh Sidhu (tinan 11), oan husi Embaixador Malazia nian iha Timor-Leste, S.E. Dato Amarjit Singh Sarjit Singh. Nia hahu nia estudu pianu iha fulan tolu liuba, foufoun aprende iha tekladu. Maski ninia períodu formasaun badak, nia hatudu interese, dedikasaun no entuziazmu neebe notavel. Ba konsertu ida-nee, nia aprezenta konjuntu husi pesa badak haat, introdusaun neebe inspira hosi melodia tradisional no universalmente rekonesida, hodi oferese ba publiku interludiu muzikal ida neebe asesivel no enkantador.
Orkestra Juvenil Dom Bosco Baucau hetan rekonesimentu nuudar embaixadora ba jerasaun muzikal foun, aprezenta repertoriu oioin neebe simboliza renovasaun no futuru muzika iha Timor-Leste. Harii iha tinan 2021 ho diresaun husi Maestro Padre Aderito Manuel Costa, orkestra nee fo formasaun muzikal neebe solida ba talentu joven sira iha Eskola Muzika Dom Bosco Baucau. Esemble nee konesidu ba ninia kapasidade atu interpreta tantu repertoriu klasiku no mos pesa kontemporanea sira, hodi desempena papel signifikativu ida hodi promove muzika no kultura entre foin-sae Timoroan sira.
Orkestra Berliku Fanu Rai (BFR) nuudar asosiasaun muzikal timor-oan neebe harii iha tinan 2009 husi Sr. Kiera Zen no formalmente rekonese husi Ministeriu Justisa iha tinan 2010. Asosiasaun nee desempena papel fundamental ida hodi promove muzika tradisional no kontemporanea hanesan veíkulu ba espresaun kultural, kapasitasaun juvenil no envolvimentu komunitariu. Ninia atividade sira inklui operasaun estudiu gravasaun profisional ida, oferta formasaun iha produsaun muzikal no enjenaria son nian, no organizaun konsertu, festival no programa edukativu sira.
Konsertu nee mistura melodia internasional sira neebe furak ho muzika tradisional Timor-Leste nian, hodi reflete nasaun nia tapeçaria kultural neebe vibrante.
Parte I konta ho atuasaun dinamika husi Orkestra Juvenil Dom Bosco Baucau, selesaun ida ba Teshan Singh Sidhu nian no repertoriu festival ida husi Orkestra Berliku Fanu Rai (BFR).
Parte II hosi konsertu konta ho abilidade pianu klasiku husi Solomon Horta, inklui ninia diskursu inspirador rua, This is Who You Are no The Hill We Climb, no projesaun filme badak Disney+ nian The Boy and the Octopus, neebe diriji husi realizador famozu Nova Zelandia nian Taika Waititi no Solomon Horta mak sai protagonista.
Konsertu nee ramata ho diskursu husi Prezidente Republika Jose Ramos Horta, tuir mai ho entrega sertifikadu ba artista sira no koktel boazvindas ida.
Iha diskursu, Prezidente Jose Ramos Horta afirma Muzika mak linguajen universal ba pas no ba uniaun nian.
“Iha armonia husi piano no orkestra nian, ita rona ita-nia nasaun nia futuru nia lianfuturu ida neebe harii iha ita-nia foin-sae sira-nia talentu, ita-nia kultura nia forsa no ritmu partilladu husi esperansa neebe halo fuan tuku-tuku iha Timor-oan sira ida-idak,” dehan Prezidente Republika.
Konsertu nee destaka ho susesu profundidade na diversidade talentu emerjente Timor Leste nian, nunee mos sai nuudar plataforma ida neebe makaas ba interkambiu kultural no dialogu liuhosi linguajen universal muzika nian.
Reportajen: Emerenciana Pinto
